Lawisanon misidlak sa online dancefest

CEBU, Philippines — Si Andrea Xela Villacarlos Gozon hinayhinay nga namupo sa bunga sa iyang paningkamot human siya misakmit og tulo ka gold medals ug usa ka silver sa miaging duha ka legs sa 2nd Cebu City Grassroots Online Dancesport Competition nga gipasiugdahan sa Cebu City Sports Commission (CCSC) inabagan sa Dancesport Academy of Cebu.

Ang 12-anyos nga si Gozon, kansang inahan nga si Lalaine lumad gikan sa lungsod sa Madridejos sa isla sa Bantayan amihanang bahin sa Sugbu, unang naka-gold sa Latin chachacha atol sa ikapitong leg.

Sa ikawalong leg niadto lamang Sabado, ang umaabot nga Grade 7 student sa Labangon Elementary School nga mapasigarbuhon niyang girepresentahan mibira og duha ka bulawang medalya sa Standard Solo Juvenile 2 waltz ug tango events ug ingon man silver sa Solo Juvenile 2a beginners samba.

Gipilde ni Gozon sila si Princess Jamae Moreno sa Tisa ug ang teammate niini sa Labangon nga si Cherlie Abella Millan sa parehong events. Si Gozon mipaambit nga gibati siyang og tumang kalipay sa dihang nasayud nga milugwa siyang usa sa mga kampiyon sa kompetisyon. “I was just having fun while dancing. It feels like all my hard work has paid off,” dason pa ni Gozon.“I would like to take this opportunity to thank my Dancesport Team Cebu City for encouraging me to do my best always and to my family, especially my mother who always supports and guides me,” dugang pa ni Gozon. “All I can say is I won’t stop until I reach the peak of success, feeling proud and contented at the same time.”