Pacquiao tutulak na sa Amerika
Lalarga sa susunod na linggo
MANILA, Philippines — Tutulak na pa-Amerika si eight-division world champion Manny Pacquiao sa susunod na linggo upang ipagpatuloy ang pukpukang ensayo sa Wild Card Gym sa Hollywood, California.
Nakatakdang umalis si Pacquiao sa Hulyo 3 para makasama sina Hall of Famer Freddie Roach at strength and conditioning expert Justine Fortune sa training camp doon.
Isa’t kalahating buwan na lamang ang nalalabi bago ang inaabangang bakbakan nito kay reigning World Boxing Council (WBC) at International Boxing Federation (IBF) welterweight champion Errol Spence Jr. sa Agosto 21 (Agosto 22 sa Maynila) na gaganapin sa MGM Grand Garden Arena sa Las Vegas, Nevada.
Nais ni Pacquiao na maagang magtungo sa Amerika upang hindi na ito mahirapan pang mag-adjust sa weather doon at ang body clock nito.
“Ngayong July 3, para pagdating ko doon hindi na ako mahihirapang mag-adjust,” ani Pacquiao sa programang Power and Play.
Matinding laban ang haharapin ni Pacquiao dahil hindi birong kalaban si Spence na kasalukuyang undefeated.
Nagpasaring pa si Pacquiao kay American undefeated fighter Floyd Mayweather Jr. na galing sa exhibition match laban kay YouTuber Logan Paul.
Hindi basta-basta pumapatol si Pacquiao kung kani-kanino dahil de kalibreng boxers ang nilalabanan nito.
“Hindi ako katulad ng iba diyan na pera pera lang kahit na hindi boxingero ang kalaban, hinahamon. Ako kasi gusto ko kasi yung fight talaga to challenge the best, laging ganon,” ani Pacquiao.
Maliban kay Spence, kasama rin sa pinagpilian ni Pacquiao sina Terence Crawford at Mikey Garcia na mga bigating boxers din sa welterweight division.
- Latest
