Cordova, Toledo nakasagunson og daog GM Wesley So Cup
CEBU, Philippines — Ang Cordova Dutchess Dagami Warriors ug Toledo City Trojans mikadlit og duha ka sagunson nga daog sa nagkainit nga aksiyon sa 1st Professional Chess Association of the Philippines (PCAP) GM Wesley So Cup niadtong Miyerules sa gabii.
Luyo sa kahait nilang Israeli Grandmaster Nitzan Steinberg, National Masters Merben Roque ug Mario Magubat, ug Woman International Master Bernadette Galas, ang Dagami Warriors ni PCAP vice chairman Ariel Potot mibuntog sa Cagayan Chess Kings ug Caloocan Loadmanna Knights sa parehong 11.5-9.5 nga desisyon.
Gumikan niini, ang Cordova padayon nga naka-angkon og bahin sa liderato sa Southern Division uban ang Camarines Soaring Eagles bitbiton ang managsamang 12-1 win-loss records.
Sa laing bahin, ang Trojans nga gipangulohan nilang Iranian GM Amir Bagheri ug IM Rico Mascarinas mitumba sa Rizal Batch Towers, 14-7, sa wala pa paksita ang Quezon City Simba's Tribe, 13.5-7.5.
Ang Trojans nagtangag na karon og 10-3 nga baraha aron saw-an ang ikatulo ug ikaupat puwesto uban ang Iloilo Kisela Knights.
Naminghoy hinoon ang laing duha pa ka Cebu teams nga Lapu-Lapu Naki Warriors ug Cebu City Machers kay nakatilaw og duha ka sunod-sunod nga pilde. Ang Lapu-Lapu natagak ngadto sa 5-8 samtang ang Cebu City nasugamak sa ika-10 nilang pilde sud sa 13 ka duwa.
- Latest