Nets gilat-an ang Bucks, 2-0 na; Suns giunhan ang Nuggets

CEBU, Philippines — Si Kevin Durant mirapido og 32 puntos uban ang unom ka assists sa dihang gi-ihaw sa Brooklyn Nets ang Milwaukee Bucks, 125-86, aron pagkulit og 2-0 nga bentaha sa ilang best-of-seven NBA Eastern Conference semifinal series kagahapon didto sa Barclays Center sa Brooklyn, New York.

Wala sab magpabitin si

Kyrie Irving nga mitali og 22 puntos ug ingon man sila si Joe Harris ug Bruce Brown nga miamot og13 puntos matag usa alang sa Nets nga mirehistro sa labing dako nilang daog sa playoffs sa kasaysayan sa ilang prangkisa.

Gikastigo sa Nets ang Bucks bisan og wala ang usa nila ka superstar nga si James Harden nga padayon pang nagpa-alim sa iyang hamstring injury. Ang ilang serye molabyog didto sa Milwaukee alang sa Game 3 karong Biyernes. Mangtas kaayo ang Nets nga sa usa ka higayon naglabaw og 49 puntos.

Ila sab nga nalimitahan ang alas sa Bucks nga si Giannis Antetokounmpo ngadto lamang sa 18 puntos. Duna sab siyay 11 ka rebounds ug 10 ka assists apan nahoyhoy ang abaga kay nalubong sila og 39 puntos human sa duwa.

Si Khris Middleton mi-iskor og 17, si Jrue Holiday mipuntos og 13 samtang sila si Brook Lopez ug Bryn Forbes dunay 10 puntos matag usa sa pilderong Bucks.

Sa laing aksiyon, si Chris Paul mibahug og 21 puntos ug 11 ka assists sa dihang gipahagba sa Phoenix Suns ang Denver Nuggets, 122-105, sa pasiunang duwa sa ilang best-of-seven West semis.

Midugang si Mikal Bridges og 23 puntos, si Devin Booker mihipos og 21 puntos samtang si Deandre Ayton mipupo og 20 puntos ug 10 ka rebounds alang sa Suns, nga milampaso sa Nuggets, 59-33, sa pinal nga 20 minutos sa aksiyon.

Si Nikola Jokic maoy nangu sa Nuggets uban ang 22 puntos, siyam ka rebounds ug tulo ka blocks samtang sila si Aaron Gordon ug Michael Porter nagkumboya og 33 puntos sa pilderong kawsa.