Cordova nakatilaw na'g pidle sa GM Wesley So Cup

CEBU, Philippines — Nahagba sa labing unang higayon ang Cordova Dutchess Dagami Warriors sa 1st Professional Chess Association of the Philippines (PCAP) GM Wesley So Cup. Human sa perpektong 10-0 nga sinugdanan, ang Dagami Warrios nahisukamod ning higayona sa mga kamot sa Camarines Soaring Eagles, 8.5-12.5, niadtong Sabado sa gabii. Dali hinoon nga nakabawi ang Cordova ug gipahimungtan niini sa ilang kayugot ang Zamboanga Sultans, 13-8, aron pag-angkon gihapon og bahin sa liderato sa Southern Division uban ang Camarines bitbit ang paregong 10-1 nga baraha.

Sa laing bahin, ang Toledo City Trojans mipayaka sa Lapu-Lapu City Naki Warriors, 11.5-9.5, apan gilampaso sab dayon sa Iloilo Kisela Knights, 4-17. Ang Trojans ug ang Kisela Knights nagtabla karon uban ang 8-3 nga marka aron okupahon ang ikatulo ug ikaupat nga puwesto sa South. Sa ubang mga resulta, ang Lapu-Lapu milansang sa ikalima niining daog sud sa 11 ka duwa human nakaipsot batok sa Palawan Queen's Gambit, 11-10, samtang ang Cebu City Machers natagak ngadto sa 3-8 human makatilaw og duha ka sagunson nga pilde batok sa Iloilo, 5-16, ug Camariners, 4.5-16.5.