IBP-Cebu mopahigayon online chess tourney

CEBU, Philippines — Ang mga Sugbuanong manlalaban makahigayon pagtakus sa ilang abilidad sa duwang aheres pinaagi sa online tournament nga giulohan og "A Lawyer's Gambit".

Gikatakda karong Mayo 8, ang usa ka adlaw nga kompetisyon gipasiugdahan sa Integrated Bar of the Philippines (IBP)-Cebu Chapter ubos sa liderato ni Atty. Cheryl Pamela Condat inabagan sa Toledo City Trojans luyo sa paningkamot sa co-team manager ug top female player niining si Atty. Jeah Jean Gacang.

Ang Toledo Trojans mitapos sa ikalimang dapit sa Southern Conference ug nakasud sa playoffs sa 1st Professional Chess Association of the Philippines (PCAP)-All Filipino Conference sa miaging bulan.

"IBP Cebu Chapter invites all lawyers from different IBP Chapters to celebrate the power of sports and connecting people for a common goal:to express friendship, camaraderie and selflessness," matud pa sa IBP-Cebu sa usa ka pamahayag.

Ang makita nga pundo sa maong kalihukan alang sa mahinungdanong kawsa adto mapunta sa IBP Cebu Community Pantry.

Ang rehistrasyon nagkantidad lang og P100.

Alang sa dugang mga detalye, kadtong mga interesado mahimong mokontak nilang Odette ug Irene sa buhatan sa IBP-Cebu (253-0637).