Doncic, Williamson parehong mihimo'g career-high

CEBU, Philippines — Parehong mihimo og career-high sila si Luka Doncic ug Zion Williamson atol sa ilang duwa kagahapon didto sa American Airlines Center sa Dallas, Texas.

Si Luka Doncic wa'y sipyat  gikan sa 3-point arc atol sa third period, mao sab si Williamson nga wala sab mapalpak sa iyang mga tira sa first half.

Miposte si Doncic og career-high 46 puntos, si Kristaps Porzingis miamot og 36 puntos alang sa  Dallas Mavericks batok sa New Orleans Pelicans, 143-130 bisan pa si Williamson mihimo og career-best 36 puntos.

Si Doncic nga aduna sa'y 12 ka assists ug walo ka rebounds, mikonektar og tulo sa upat ka 3-pointers sa Dallas sud lang sa 39 segundos dihang ang Mavs mipasud og 13 sa ilang 15 ka itsa sa third period.

Ang Mavs mitabla sa ilang season best uban ang upat ka sunod-sunomd nga daog  ug mipukan sa Pelicans sud sa lima ka sagunsong higayon.

Si Williamson mihimo og usa ka franchise record sa Pelicans pinaagi sa pagpasud sa tanang 10 niya ka mga itsa sa first half. Nakapasud siya og 14 sa 15 ka itsa. Bugtong sipyat niya mao ang libre kaayo niyang itsa gikan sa 3-point arc sa sayong bahin sa second half.

Didto sa Chicago,  si Kawhi Leonard mibagnos og 33 puntos,  samtang sila si Lou Williams ug Marcus Morris Sr. nakatabang sab ilabi na sa fourth quarter dihang ang Los Angeles Clippers wa'y kukaluoy miihaw sa kaugalingong nataran sa Chicago Bulls, 125-106 sa NBA kagahapon didto sa United Center sa Illinois, Chicago.

Si Morris miiskor og 15 sa iyang 20 puntos sa fourth period ug si Williams miabuno'g 11 sa iyang 17 puntos sa final period alang sa Clippers nga nakasagunson og duha ka daog human sab masagunsoni og duha ka pilde.

Si Zach LaVine nga bag-o lang nihaw-as og season-high 46 puntos, miiskor og 26 puntos aron mangulo sa Bulls. 

Nag-amotay og 17 puntos sila si Coby White ug Tomas Satoransky alang sa Bulls nga aduna na'y 4-9 sa ilang balwarte.