Pinoy boxers babanderahan nina Petecio, Ladon
Kakasa sa Olympic qualifying
MANILA, Philippines — Hindi lahat ng mga miyembro ng national boxing team ay isasalang sa pinakahuling qualifying tournament para sa 2021 Olympic Games sa Tokyo, Japan sa Hulyo.
Sinabi ni national head coach Nolito ‘Boy’ Velasco na dalawa lamang sa women’s team at lima sa men’s squad ang ilalaban nila sa nasabing qualifying competition sa Paris, France sa Hunyo.
“Pang sparring iyong iba,” wika ni Velasco sa panayam ng PSN Sports kahapon. “Dalawa pa sa babae ang pang laban natin sa qualifying. Sa lalaki lima naman ang ilalaban natin sa qualifying.”
Kasalukuyan nang nagpapakondisyon ang mga miyembro ng national women’s at men’s teams sa ‘bubble’ sa Inspire Sports Academy sa Calamba, Laguna.
“Wala pang mga sparring. Baka sa February 15 pa magsisimula,” wika ni Velasco sa mga national boxers.
Kasama ni flyweight Irish Magno, nakasuntok na ng tiket sa 2021 Tokyo Olympics, sa mga nag-eensayo sa ‘Calambubble’ sina 2019 AIBA Women’s Championships gold medalist Nesthy Petecio, Aira Villegas, Riza Pasuit, Analyn Cellon at Josie Gabuco.
Sina 2016 Rio de Janeiro Olympics qualifier Rogen Ladon, Carlo Paalam, Ian Clark Bautista, Marvin Tabamo, John Paul Panuayan, Mario Fernandez, Jere Dela Cruz, Marjon Pianar at Junmilardo Ogayre ang mga miyembro ng men’s national squad.
Maliban kay Magno, ang iba pang mayroon nang Olympic berth ay sina boxer Eumir Felix Marcial, pole vaulter Ernest John Obiena at gymnast Carlos Edriel Yulo.
- Latest
