PSC sa NSAs: Atleta ipadala sa bansang walang travel ban sa mga Pinoy
MANILA, Philippines — Dahil sa pagkalat ng coronavirus disease (COVID-19) ay ilang bansa na ang naglagay ng travel ban sa Pilipinas na hangad makapagpadala ng atleta para sa 2020 Olympic Games sa Tokyo, Japan.
Hinikayat ni Team Philippines Chef de Mission Nonong Araneta ang mga National Sports Associations na humanap ng mga bansang walang banta ng COVID-19.
“Sa ngayon two countries pa lang iyan, Kuwait at Qatar, baka pati ‘yung ibang countries pa in which we have a qualifying event,” wika ni Araneta.
Apat na Pinoy athletes na ang nakasikwat ng tiket para sa 2020 Tokyo Games na idaraos sa Hulyo 24 hanggang Agosto 9.
Ang mga ito ay sina pole vaulter Ernest John Obiena, gymnast Carlos Yulo at boxers Eumir Marcial at Irish Magno.
May 64 atleta mula sa archery, athletics, swimming, basketball, boxing, cycling, canoe-kayak, fencing, golf, gymnastics, judo, karate, rowing, skateboarding, table tennis, taekwondo, triathlon, weightlifting at wrestling ang naghahangad na makapasok sa Tokyo Olympics.
Sinabi naman ni Philippine Sports Commission Chief of Staff Marc Velasco na kailangang maagang makapunta ang nasabing mga atleta sa lalahukan nilang Olympic qualifying.
“The (PSC) Board’s consensus is we might send them two weeks ahead of their planned qualification tournament just to ensure that we are doing our quarantine procedure,” sabi ni Velasco.
- Latest
