Magno, Paalam sa quarters
MANILA, Philippines — Patuloy na lumilipad ang bandila ng Pilipinas matapos umabante sa quarterfinals ang dalawa pang miyembro ng national team sa prestihiyosong 2020 Asian-Oceanian Continental Olympic Qualifying Tournament na ginaganap sa Prince Hamzah Hall sa Amman, Jordan.
Ibinuhos nina Irish Magno at Carlo Paalam ang buong lakas nito para makalapit sa inaasam na tiket sa Tokyo Games.
Agad na naglatag ng matikas na puwersa si Magno para hablutin ang impresibong second-round referee-stopped-contest win laban kay Winnie Au Yin Yin ng Hong Kong sa women’s flyweight category.
Hindi rin nakaporma sa tikas ni Paalam si Ramish Rahmani ng Afghanistan matapos itarak ang unanimous decision win (5-0) sa kanilang bakbakan sa men’s flyweight class.
Tuluyan nang namaalam sa kontensiyon si Ian Clark Bautista sa men’s featherweight matapos lumasap ng unanimous decision loss (0-5) kay Southeast Asian Games champion Butdee Chatchai-Decha ng Thailand.
- Latest
