Bag-ong Gilas coach mahibaw-an na unya
CEBU, Philippines — Mahibaw-an na unya sa dili madugay ang bag-o ug permanente nga head coach sa Gilas Pilipinas.
Ang Samahang Basketbol ng Pilipinas (SBP) miingon nga nganlan na nila sud ning bulana ang bag-ong coach sa Gilas aron usab masugdan na ilang preparasyon alang sa 2023 FIBA World Cup. Ang Gilas mobalik sa aksiyon sa Pebrero 23 sa FIBA Asia Cup qualifiers.
Kahinumduman, si multi-titled coach Tim Cone miingon nga modawat lang siya sa trabaho isip head coach sa Gilas sa Southeast Asian Games ug human sa iyang misyon, maisip na nga bakante na ang posisyon sa Gilas head coach karon.
Wala pa usab gibasura sa SBP ang posibilidad nga mausab ang huna-huna ni Cone, apan aduna na usab mga pangan nga milutaw aron maoy mosunod coach sa Gilas ug kini naglakip nila ni PBA legendary coach Norman Black, kanhi national team coach Jong Uichico ug Tab Baldwin.
"All those we know are possible candidates," matud ni SBP president Al Panlilio sa Philippine Star. “Coach Tim will always be a possibility, but our agreement with him really was just the Southeast Asian Games. He has his commitment with his ball club which is to play in the (PBA Governors Cup) finals.”
Matud ni Panlilio nga dili angay maglangay ang Gilas sa pagkuha og bag-ong coach ilabi na nga seryoso sila sa ilang programa pagbaid sa abilidad sa mga batan-ong players nga maoy morepresentar sa Pilipinas sa World Cup.
Ang gipasabot nga mga players ni Panlilio mao ang Gilas cadets nga gilangkuban sa mga PBA rookies diin lakip ang Cebuano shooter nga si Rey Suerte, Thirdy Ravena, Isaac Go, Kobe Paras ug 7-foot-2 Kai Sotto.
- Latest
