Lakers nakabawi
CEBU, Philippines — Nakabangon ang Los Angeles Lakers ug naputol nila ang upat ka nagkadinang pilde human nila gipukan ang Portland Trail Blazers, 128-120, kagahapon didto sa Portland, Oregon.
Bisan og may gihambin nga injury, mipugos pagduwa ang three-time champion nga si LeBron James kinsa mirehistro og double-double 21 puntos ug 16 ka assists, samtang nahimong leading scorer si Kyle Kuzma nga mitira og 24 puntos.
Balanse nga opensa ang gipakita sa Lakers diin nakabintaha sila sa bench points nga adunay 72 puntos itandi sa Blazers nga aduna lang 36 puntos. Miiskor usab og 20 puntos ang All-Star nga si Anthony Davis uban ang siyam ka rebounds.
Ang Lakers nagpabilin sa unang dapit sa West Conference division sa ilang 25-7 win-loss record kini bisan pa og miagi sila og hamubo nga losing-streak.
“It’s not fun losing. We’re a good team and we we’re able to use that to our advantage and take it out on this team,” matud pa ni Lakers coach Frank Vogel sa NBA.com.
Si Damian Lillard adunay 31 puntos aron pangulohan ang Blazers nga nakatilaw sa ikatulo nilang sunod-sunod nga kaparotan.
Sa laing duwa, ang Serbian superstar sa nga si Luka Doncic mirehistro sa ikasiyam niyang triple-double bisan pa og usa ka siya ka rookie.
Si Doncic mitali og 31 puntos, 15 ka asssits ug 12 ka rebounds aron pangulohan ang Dallas Mavericks nga milatos sa Golden State Warriors, 141-121.
Sa ubang mga duwa, ang Milwaukee Bucks misungag sa Orlando Magic, 111-110, ang San Antonio Spurs miligis sa Detroit Pistons, 136-109, gipayukbo sa Utah Jazz ang LA Clippers, 120-107, gidauban sa Phoenix Suns ang Sacramento Kings, 112-110 ug ang Houston Rockets mipilde sa Brooklyn Nets, 108-98.
- Latest
