Lakers 'lingkawas sa Thunder

CEBU, Philippines — Mipaksit si Anthony Davis og 24 sa iyang 33 puntos sa second half aron aswaton ang Los Angeles Lakers ngadto sa 130-127 nga kadaogan batok sa Oklahoma City Thunder sa NBA kagahapon didto sa Chesapeake Energy Arena sa Oklahoma.

Milangkat sab si Davis og 11 ka rebounds ug pito ka assists, samtang si LeBron James miabuno og 23 puntos  alang sa Lakers nga miposte sa ikaunom nilang sagunson nga daog aron inaton ang labing nindot nga record karong NBA season ngadto sa 13-2.

Sila si Shai Gilgeous-Alexander ug Steven Adams nagkumbinar og 22 puntos alang sa nahilom nga Thunder.

Didto sa American Airlines Arena sa Dallas, Texas, si Luka Doncic mikadlit og 30 puntos ug 14 ka assists sa dihang gilat-an sa Mavericks ang Cleveland Cavaliers sa iskor nga 143-101.

Wala sab magpaalkansi si Tobias Harris nga mihipos og 26 puntos ug ingon man si Joel Embiid nga mipupo og 21 puntos ug 14 ka rebounds sa dihang gipatilaw sa Philadelphia 76ers ang San Antonio Spurs sa ikawalo niining sunod-sunod nga pilde, 115-104.

Sa aksiyon didto sa Salt Lake City, si Donovan Mitchell miiskor og 30 puntos sa Utah Jazz nga mipilde sa Golden State Warriors, 113-109.

Dako sab og natabang si Bojan Bogdanovic nga dunay 17 puntos ug ingon man si Rudy Gobert nga mitimbre og 19 puntos ug pito ka blocks alang sa Jazz.

Sa uban pang mga resulta, si  Andre Drummond mibahog og 23 puntos ug 15 ka rebounds sa dihang  gipanitan sa Detroit Pistons ang Atlanta Hawks, 128-103, si Bradley Beal miratsada og 30 puntos aron pangulohan ang Washington Wizards nga miukan sa Charlotte Hornets, 125-118, si Jimmy Butler mikamada og 27 puntos alang sa Miami Heat nga mipakaging Chicago Bulls, 116-108, samtang sila si  Spencer Dinwiddie ug Joe Harris nagkumboya'g 45 puntos sa Brooklyn Nets ang Sacramento Kings, 116-97.