AVTES, Harold's Hotel milansang ikaduha nilang daog sa FYA Season 24

CEBU, Philippines — Ang AVTES milansang sa ilang ikaduhang daog human nila mabuntog ang Masterline, 65-59 sa FYA Basketball Tournament (Season 24) Soontit Construction Cup 2019-2020 niadtong Martes diha sa Atillo gym sa Punta Princesa, Dakbayan sa Sugbo.

Si ballclub president Dexter Caballero nahimo na sab nga best player of the game dihang iyang gipangulohan ang AVTES sa ikaupat nga higayon pinaagi sa iyang 14 puntos, lima ka rebounds, lima ka assists ug duha ka steals.

Ang AVTES nilang playing team managers Allen Tulod ug Mayor Macky Macachor nakakuha sab og maayong suporta gikan ni Jade Ursal nga miligwat og 11 puntos.

Ang AVTES ug Masterline pareho nang nagtangag og 2-2 nga baraha.

Labaw ang AVTES paghuman sa unang 10 minutos sa duwa, 21-16, apan nibahar sa second period hinungdan nga ang Masterline na ang nakabentaha sa halftime, 31-23.

Nanginit og balik ang AVTES sa fourth quarter uban sa nagpungasi nga opensa aron makuha og balik ang labaw.

Sila si Dandan Bocado ug Socrates Aglipa mipugnit og 10 puntos matag usa aron mangulo sa napildeng Masterline ni Noel Medalle.

Sa laing aksiyon, ang Harold's Hotel miposte sab og 2-2 nga baraha pinaagi sa pagpukan sa Central Ice Cream/Nevaeh Sales Trading, 74-63.

Si Nene Billones mikadlit og 22 puntos uban ang lima ka rebounds ug duha ka assists nga nakatabang kaniya aron mahimong best player of the game.

Nakatampo sab og dako si Carlos Arnado nga mitimbre og 21 puntos.

Sayo pa lang gani sa duwa, nagpangamay na ang daog sa Harold's Hotel ni Arnel Trinidad human milabaw og 24 puntos sa first period, 35-11.

Naprotehian nila ang ilang double digits nga labaw hangtod sa katapusang gutlo sa duwa.

Ang Central Ice Cream/Nevaeh Sales Trading nilang Jofel Tejada ug Noel Medalle nga nagbitbit og 1-3 nga baraha, gipangulohan ni Emman Reubal nga miburak og 18 puntos, gisundan ni Dodie De Gracia nga adunay 14 puntos.

PUNTOS MATAG USA

Unang duwa:

AVTES (65) – Caballero 14, Ursal 11, W. Dacayana 9, J. Sydiongco 9, R. Villaver 9, Baiño 7, Macachor 4, Laput 2.

MASTERLINE (59) – Bocado 10, S. Aglipa 10, Tandoy 9, Sy 8, Eriso 8, Lumagbas 6, Jabonero 4, Perami 4.

Ikaduhang duwa:

HAROLD'S HOTEL (74) – Billones 22, Arnado 21, R. Arias 8, A. Flores 8, J. Cabañez 5, Cal 4, Jumantoc 4, B. Medalle 2.

CENTRAL ICE CREAM (63) – Reubal 18, De Gracia 14, Angkos 6, Tejada 6, M. Ancla 6, Dela Peña 5, Miano 2, T. Abella 2, N. Medalle 2.