Kings mipakgang sa Celtics

CEBU, Philippines — Mihimo og season-high 35 puntos si Buddy Hield dihang giputol sa Sacramento Kings ang nagkadinang 10 ka daog sa Boston Celtics sa ligas kaayo nilang duwa sa NBA, 100-99 kagahapon didto sa Gold 1 Center sa Sacramento, California.

Gawas ni Hield, mibida sab ang sentrong si Richaun Holmes, kansang duha ka free throws sa nahibilin 13 segundos sa duwa maoy nagtunol sa Kings sa ikalima niining daog sa miagi nilang pito ka duwa.

Ang Serbian nga si Bogdan Bogdanovic miamot og 12 puntos ug 10 ka rebounds, samtang ang kababayan niyang si Nemanja Bjelica midugang og 12 puntos ug 14 ka rebounds alang sa Kings nga nindot kaayo ang gipakitang agi sukad misukarap sa nag-una nilang lima ka duwa karon nga season.

Si Jaylen Brown mihipos og 18 puntos uban ang walo ka rebounds, samtang si Kemba Walker mitali og 15 puntos ug siyam ka assists alang sa pilderong Celtics nga natagak ngadto sa 10-2.

Sa laing duwa, si LeBron James mipabuto og 33 puntos aron pangulohan ang Los Angeles Lakers  pagbihag sa Atlanta Hawks sa iskor nga 122-101.

Ang Lakers wala na molingi pa sukad miposte og 25 puntos nga labaw sa unang kuwarter.

Mitampo si Rajon Rondo og 15 puntos, samtang si Anthony Davis miposte og 14 puntos alang sa Lakers nga miinat sa nagkadina nilang daog ngadto sa 11  sukad sila gipiog sa LA Clippers sa ilang season-opener. 

Si Trae Young miratsada og 31 puntos, apan naminghoy kay ang Hawks nabihag sa ikatulong sunod-sunod nga higayon.

Sa uban pang mga resulta, sila si Jamal Murray ug Paul Millsap nagkumbinar og 62 puntos sa dihang gipaksit sa Denver Nuggets ang Memphis Grizzlies, 131-114, si Tobias Harris mitimbre og 27 puntos sa dihang gilampurnas sa Philadelphia 76ers ang Cleveland Cavaliers, 114-95, samtang ang Orlando Magic nagsandig sa pagkamabayanihon ni Markelle Fultz aron pildihon ang Washington Wizards, 125-121.