Rollway/Abay-Abay midemolis sa Expressway sa ABCC Season 2

CEBU, Philippines —  Nakigsawo na sab sa liderato ang Rollway/Abay-Abay Customs Brokerage dihang ilang gidemolis ang Expressway Logistics & Brokerage Corp., 90-63 sa Aduana Basketball Club Cebu (ABCC) Season 2 Inter-Brokerage Cup 2019 niadtong Huwebes diha sa Cebu Port Authority (CPA) gym.

Ang Rollway/Abay-Abay kasamtangang nag-una sa bracket A standing uban sa Hov/Martinez Customs Brokerage nga parehong adunay 5-0 nga baraha.

Si Nimrod Amorin nga maoy best player ang nangu sa upat ka Rollway/Abay-Abay players nga miiskor og double figures pinaagi sa iyang 18 puntos uban ang pito ka rebounds ug duha ka assists.

Laing nakahimo og double figures mao si Jeffrey Palad nga miariya og 17 puntos, sila si Eswood Sanchez ug Glenn Urbina nagkumboya'g 22 puntos sa Rollway/Abay-Abay nga sa pagsugod pa lang mirumbo dayon sa Expressway aron motala og 30-11 nga bentaha sa first period.

Wala pa makontento, ang Rollway/Abay-Abay miinat pa sa ilang labaw ngadto sa 68-41 aron segurong modaog.

Upat sab ka mga magduduwa sa Expressway ang mirehistro og double digits sa pagpangulo ni Nicky Co nga nimaneobra og 16 puntos. Sila si Lord Michael Estrellanes ug Pingkian nagtampohay og 11 puntos, samtang si Mark Co miambit og 10 puntos sa naparot nga Expressway nga mitapos sa liga uban ang 1-5 win-loss record.

Bisan midaog pa ang Expressway, matagak lang gihapon sila kay gipanag-iya na sa Avenido Customs Brokerage ang ikaupat nga luna alang sa crossover quarterfinals human ma-forfeit ang natagak na sab nga Grancho Customs Brokerage nga aduna sa'y 1-5 nga baraha.

Ang mga duwa ubos sa superbisyon ni league commissioner Sidney Ganapin.