1st South Dreamers Basketball League mosikad karong weekend
CEBU, Philippines – Miabot ngadto sa 30 ka teams ang magtigi alang sa titulo sa duha ka dibisyon sa labing unang season sa South Dreamers Basketball League nga mosikad karong Sabado, diha sa Vista Grande gym sa Barangay Bulacao, Dakbayan sa Talisay.
Katorse ka mga koponan ang magtigi sa Under 18, samtang 16 ang magbugno sa Under 16 age group.
Ang mga entrante sa U18 mao ang Thumbs Up, Minglanilla Ballers 1 ug 2, RnT, Toledo City, Rizbros, Benhur D`Rabens, Ankle Breakers, University of San Jose-Recoletos (USJ-R) Balamban Campus, Green Rose ug Mingla Archangels.
Mopakita og aksiyon sa U16 mao ang San Roque, Salazar Colleges of Science and Institute of Technology (SCSIT), RnT, Mingla Archangels, Hoopbreakers, Minglanilla Ballers A, B ug C, Rizbros, USJ-R Basak Campus, Mary Help of Christian School, Monterey Lions, Thumbs Up 1 ug 2, Don Bosco, Biasong ug Cansojong.
Bahinon sila sa duha ka brackets diin ang top 2 teams matag bracket mo-abante sa crossover semifinals. Ang mga mananaog maoy mag-abot sa kampiyonato.
Ubos sa ilang motto nga "Chase Your Dreams", ang South Dreamers giporma nilang coach Dennis Lee Pacquiao, Luzette Degala Pritscher ug Genesis Franco sa tinguha nga mahatagan og higayon kadtong mga batan-ong basketbolista nga mabaid og maayo ang ilang abilidad ug ingon man makab-ot ang ilang mga damgo ugma damlag.
- Latest