Cebu Sharks mitikub sa Muntinlupa Cagers

CEBU, Philippines — Gilampornas sa Casino Ethyl Alcohol-Cebu Sharks ang Muntinlupa Cagers, 79-62, aron pakgangon ang duha ka sunod-sunod nilang pilde sa Maharlika Pilipinas Basketball League (MPBL) Lakan Cup niadtong Sabado sa gabii didto sa Hoopsdome sa Barangay Gun-ob, dakbayan sa Lapu-Lapu.

Nagmangtas og maayo si Patrick Cabahug hinungdan sa pagratsada niini og 26 puntos uban ang pito ka rebounds ug duha ka assists nga nakatabang og dako sa Sharks aron inaton ang ilang record ngadto sa 4-5.

Nagparamdam sad si Edrian Lao uban ang 12 puntos ug lima ka rebounds samtang si Rhaffy Octobre mi-iskor lamang og nuybe apan dako sab og natampo sa Sharks bitbit ang 12 ka rebounds, tulo ka assists, usa ka steal ug usa ka block.

Ang Sharks migamit sa bagsik niining ataki sa ikatulong kuwarter aron patikalbongon ang Cagers.

Alkansi og siyete puntos sa halftime, 34-41, ang Sharks milusad og nagkayong 28-9 rally nga nakahatag kanila og 12 puntos nga labaw, 62-50.

Ang Sharks nakasustinir sa ilang kainit dayon na ngadto sa pagposte sa kinadak-an nilang labaw nga 21 puntos, 74-53, sa 3-pointer ni Fletcher Galvez sa nahibilin nga 4:05 sa duwa.

Si Biboy Enguio dunay 16 puntos ug 11 ka rebounds apan nakawang ang iyang paningkamot kay ang Cagers nakatilaw sa ikapito niining pilde sud sa 10 ka duwa.