8 ginto puntirya ng tropa ni Didal sa Manila SEAG

MANILA, Philippines — Target ng Skateboar­ding and Roller Sports Association of the Philippines, Inc. (SRSAPI) na wa­lisin ang walong gintong medalya na paglalabanan sa darating na 2019 Southeast Asian Games na gaganapin dito sa Pilipinas sa Nobyembre 30 hanggang sa Disyembre 11.

Nagpahayag si  SRSAPI president Monty Mendigoria sa kanyang malakas na tiwala sa kakayahan ng national team sa pag-domina sa skateboarding event sa isinagawang TOPS Usapang Sports sa National Press Club.

Mas lalong lumakas ang tsansa ng Philippine national skateboarding team sa pagsali ng mga Filipino-American players na sina 21-anyos Christiana Means at 18-anyos na taga-Carson, California na si Jericho “Kiko” Francisco Jr. na kapwa world-rated athletes sa larangan ng skateboarding.

“We’re eyeing a sweep of all eight golds at stake in the SEA Games. With a team reinforced by top-level Fil-foreigners, I think we can achieve our goal,” sabi ni Mendigoria sa TOPS Forum.

Bukod sa dalawang US-based skateboarders, sasandal din si Mendigoria kay 2018 Asian Games gold medalist Margielyn Didal. Ang ibang miyembro ng koponan sa ngayon ay sina Renzo Mark Feliciano at  Jeff Gonzales.

Maaasahan umano sina Means at Didal sa women’s division ng street, park at downhill events habang si Francisco ay pambato ng bansa sa parehong street, park at downhill event sa men’s division.

Si Means ay taga Portland, Oregon na sa ngayon ay No. 69th overall sa world ranking. Tumapos sa 16th place  sa 2019 World Skate London Women’s Open at 4th place sa 2019 Damn AM Los Angeles Women’s Finals.

Tumaas na rin ang kanyang ranking matapos tumapos ng 12th place sa 2019 Street League World Championships na ginanap sa Rio de Janeiro, Brazil noong Enero.

Ang skateboarding event ng SEAG  ay gaga­napin sa Tagaytay City kung saan ginagawa ang Skateboarding  Park na matatapos sa September.