Nets miduol sa playoffs

CEBU, Philippines — Si D’Angelo Russell miposte og 25 puntos ug 10 ka assists sa dihang gibuntog sa Brooklyn Nets ang undermanned nga Milwaukee Bucks, 133-128, aron palig-onon ang ilang puwesto sa karera sa NBA Eastern Conference playoffs.

Ang Nets, nga milansang og 19 ka tres, dunay walo ka players nga mirehistro og double figures apil na sila si Caris LeVert ug Jared Dudley nga nagkumboya og 40 puntos.

Bitbit ang tablang 40-40 nga baraha, ang Nets misaka ngadto sa ikaunom nga dapit sa East. Ang Orlando Magic duna say 40-40 record ug nagginhawa ubos sa ilang liog ang Detroit Pistons nga dunay 39-40 nga marka.

Ang Bucks miduwa nga wala ang alas nilang Giannis Antetokounmpo kay nayayay. Wa na hinooy kwenta ang ilang pilde kay ila na mang gi-angkon ang labing nindot nga 59-21 record sa NBA karong season human gipatikalbong ang Philadelphia 76ers niadtong Biyernes.

Nangu sa Bucks mao si Eric Bledsoe uban ang 33 puntos ug 11 ka assists, samtang si Khris Middleton mihipos og 24 puntos.

Ang Bucks naglabaw og dos puntos, 128-126, human sa duha ka free throws ni Bledsoe sa nahibiling 2:30 sa duwa apan gihuman sa Nets ang duwa pinaagi sa 7-0 run.

Sa laing duwa, si JJ Reddick mi-iskor og 23 samtang si Joel Embiid dunay 20 puntos, 10 ka rebounds, lima ka assists ug tulo ka blocks sa dihang gi-ihaw sa Philadelphia 76ers ang Chicago Bulls, 116-96.

Segurado na sa playoss ang 76ers bitbit ang 50-30 record, samtang ang Bulls (22-58) hagbay rang natagak.