Yaw-Yan fighters nagbangis sa Sogod

CEBU, Philippines — Tulo ka mga fighters sa Yaw-Yan Ardigma Cebu ang pulos midaog sa tagsa-tagsa nila ka mga sangka atol sa  'Sogod Unleashed' mixed martial arts card niadtong miaging gabii didto sa Sogod gymnasium sa Sogod, Cebu.

Ang featherweight prospect nga si Allan Albindo maoy unang mihatag og daog ni Yaw-Yan ArDigma Cebu founder Benigno 'Ekin' Caniga Jr. dihang iyang gibalian sa second round ang beterano nga si Jessie Cabalquinto sa Two Edge MMA. Si Albindo wa pay pilde sud sa lima niya ka amateur fights.

Lightweight Clint Jun Bahala milatos usab ni John Edu Torbiso sa Durex Dragon MMA sa first round, samtang ang teen sensation nga si Josh  Ybañez  mipaundang ni Adi Bineranda sa Club Amigo/Black Panther MMA pinaagi sa armbar submission.

Laing mga midaog sila si Krista Barbosa sa Ken Kickboxing kinsa mipasurender ni Alliah Torbiso sa Durex Dragon, samtang ang teammate ni Barbosa nga si Christian Tabunag mi-TKO usab ni Manases Gaudan sa Club Amigo. (BANAT NEWS)