Pacers tambak sa Warriors

INDIANAPOLIS — Humugot si guard Stephen Curry ng 23 sa kanyang 26 points sa first half habang kumolekta si center DeMarcus Cousins ng 22 markers para tulungan ang Golden State Warriors sa 132-100 pagbugbog sa Indiana Pacers.

Ito ang pang-11 sunod na arangkada ng Golden State.

Nagdagdag si Kevin Durant ng 16 points para sa Warriors, itinala ang league-best 10 sunod na road wins at winalis ang unang five-game road trip simula noong Nobyembre 2014.

Hindi naman naglaro si Draymond Green.

Umiskor si Myles Turner ng 16 points kasunod ang 15 markers ni Bojan Bogdanovic sa panig ng Indiana, naipatalo ang ikalawang sunod na laban sapul nang magkaroon si All-Star guard Victor Oladipo ng season-ending knee injury.

Sa Charlotte, tumipa sina guards Kemba Walker at Tony Parker ng tig-15 points  samantalang nagsalpak si Malik Monk ng apat na clutch 3-pointers sa fourth quarter para akayin ang Hornets sa 101-92 panalo kontra sa New York Knicks.

Ipinalasap ng Charlotte ang pang-10 dikit na kamalasan ng New York.

Iniskor ni Monk ang 12 sa kanyang 14 points sa fourth quarter para ihulog ng Hornets ang 17-1 atake laban sa Knicks, nakahugot kay Kevin Knox ng 19 points kasunod ang 17 markers ni Tim Hardaway Jr.

Hindi pa nananalo ang New York mula nang talunin ang Charlotte noong Disyembre 14.

Sa Memphis, nagposte si Nikola Jokic ng 24 points at isinalpak ang go-ahead basket sa huling 28.9 segundo para ibangon ang Denver Nuggets mula sa 25-point second-half deficit at patumbahin ang Grizzlies, 95-92.

Ang triple ni Will Barton sa nalalabing 43 segundo ang nagbigay sa Nuggets ng 91-89 abante kasunod ang tres ni Justin Holiday para sa 92-91 kalamangan ng Grizzlies.

Ang basket ni Jokic ang tuluyan nang sumelyo sa panalo ng Denver, nakakuha kay Malik Beasley ng 18 points, ang 13 dito ay kanyang ginawa sa fourth quarter habang tumapos si Barton na may 20 points.

Ang 34-15 record ng Nuggets ang kanilang best start sa franchise history.

Pinamunuan ni Marc Gasol ang Grizzlies mula sa kanyang 28 points at kumolekta si Mike Conley ng 23 points at 11 assists.