Thirdy ibibigay ang lahat para mapasama sa Final 12

MANILA, Philippines — Malaki ang matututuhan ni Ateneo Blue Eagles guard Thirdy Ravena sa pagiging miyembro ng national pool ng Team Pilipinas.

Bukod sa pakikipagsabayan sa mga PBA superstars ay gigiyahan din si Ravena ni national head coach Yeng Guiao.

“It's an opportunity for him to play against the pros, so he's got nothing to lose but everything to gain,” sabi ni dating PBA guard Bong Ravena sa kanyang 22-anyos na anak.

Idinagdag ni Guiao ang 6-foot-1 na si Ravena sa kanyang national pool na paghuhugutan ng Final 12 para sa sixth at final window ng 2019 FIBA World Cup Asian Qualifiers.

Kamakalawa ay opisyal nang sumama si Ravena sa ensayo ng national pool na paghahandaan ang Qatar at Kazakhstan sa Pebrero 21 at 24, ayon sa pagkakasunod, sa kanilang road games.

Kailangang maipanalo ng Team Pilipinas ang naturang dalawang laro para sa tsansang makapagbulsa ng tiket sa 2019 FIBA World Cup na gagawin sa China.

“Kailangan kong mag-step up and do whatever it takes to get coach Yeng and the entire coaching staff's trust, kasi malaking responsibility 'yung magre-represent ka ng bansa mo,” sabi ng kapatid ni NLEX star guard Kiefer Ravena.

Ang iba pang miyembro ng national pool--sina Jayson Castro, Paul Lee, Scottie Thompson, Mark Barroca, Roger Pogoy, Marcio Lassiter, Gabe Norwood, Japeth Aguilar, JP Erram, June Mar Fajardo, naturalized center Andray Blatche, back-up national player Christian Standhardinger, Troy Rosario at Raymond Almazan.