Harold's hotel, Angel Mary pawnshop daog

CEBU, Philippines – Parehong miiskor og 10 puntos nga kadaogan ang Harold's Hotel ug Angel Mary Pawnshop batok sa tagsa-tagsa nilang kaatbang sa nagpadayong akisyon sa FYA Basketball Tournament (Season 22)  Pastrano's Special Chicharon Cup 2018.

Ang Harold's Hotel mipahamtang sa ikaduhang sunod-sunod nga pilde sa Ejay & Ejean Sportswear, 87-77, samtang ang Angel Mary Pawnshop mipilde sab sa Z&G Pro Audio, 97-87.

Ang kadaogan sa Harold's Hotel ug Angel Mary nakamugna og 'triple-tie' sa liderato uban sa Z&G Pro Audio sa managsama nilang 4-2 nga baraha.

Si Ryan 'The Skyscraper' Dacayana mirehistro og 18 puntos nga gidayandayanan og 16 ka rebounds, siyam ka block shots ug unom ka assists aron mahimong 'best player of the game'.

Gawas ni Dacayana, laing lima niya ka teammates ang mihimo'g double figures performance. Si Wendell Rollon miantog og 16 puntos, Edgemar Jumantoc  nga adunay 13 puntos, Burnong Endrina mitikdol og 12 puntos, samtang sila si Clifford Parba ug Jobert Barro nagtampohay og 10 puntos sa Harold's Hotel ni Arnel Trinidad.

Labaw ang Harold's Hotel sa first period, 27-17, apan nalaarma sila  dihang nailog sa Ejay & Ejean ang labaw human sa tulo ka kuwarter, 69-64. Apan ang Harold's Hotel milusad og bangis nga ataki nga nakapawong sa paglaum sa Ejay & Ejean nga nagbitbit na og 2-4 nga baraha.

Nangulo sa Ejay & Ejean mao si Jas Sydiongco nga mitimbre og 15 puntos, gisundan sa team manager niining si Noel Medalle nga mitimang og 14 puntos ug Wako Dacayana sa iyang 13 puntos.

Sa laing bahin, nagmangtas na sab si Ryan 'Raging Bull' Villaver diin misungag kini og 28 puntos aron mangulo sa scoring sa Angel Mary Pawnshop. Si Villaver milangkat sab og 12 ka rebounds, walo ka assists ug lima ka block shots nga nakapahimo niyang best player of the game.

Mikawat sab og salida si team manager McLain Alkuino nga mibugha og 17 puntos, si Jay-R Laurente mitampo og 14 puntos, si Val Ramirez miambit og 13 puntos, samtang sila si Jim-Jim Rara ug Albert Encarguez mitampo'g 11 ug 10 puntos matag usa.

Ang     Z&G   Pro Audio   gipangulohan ni Mervin Manila nga mipabuhagay og 20 puntos, gisundan ni Dexter Caballero nga mitimang og 18 puntos.  Sila si Dave Caballes ug Socrates Trocio mihipos og 10 puntos, samtang ang co-managers nga sila si Macky Macachor ug Dave Natividad nagkumboya'g 11 puntos.

PUNTOS MATAG USA

Unang duwa:

HAROLD'S Hotel (87) –  Dacayana 18, Rollon 16, Jumantoc 13, B. Endrina 12, Parba 10, Barro 10, Ursal 5, Celestial 3.

EJAY & EJEAN (77) – Sydiongco 15, N. Medalle 14, W. Dacayana 13, Sabijon 8, R. Tabares 8, Sarsaba 5, Marata 4, AJ Abella 2, Demol 2, Labrador 2, J. Enriguez 2, T. Abella 2.

Ikaduhang duwa:

ANGEL Mary (97) –  Villaver 28, Alkuino 17, Laurente 14, Ramirez 13, Rara 11, A. Encarguez 10, Masongsong 2, Rama 2.

Z&G Pro Audio (87) – Manila 20, D. Caballero 18, Caballes 14, Trocio 10, Aries 8, Macachor 7, Natividad 4, Tolentino 4, Dechosa 2.