Golovkin, Alvarez magbinukbukay na sab

CEBU, Philippines — Suwayan nilang Gennady Golovkin ug Saul 'Canelo' Alvarez nga matuldokan ang wala pa maresulba nilang isyu sa dihang magbinukbukay sila pag-usab sa seguradong eksplosibo ug dumot nga 'rematch' karong udto didto sa T-Mobile Arena sa Las Vegas, Nevada.

Usa ka tuig ang milabay, ang duha ka banggiitang boksidor nagsinukmagay sa labing unang higayon, apan naputos kini og kontrobersiya human gideklara nga 'tabla' bisan og klaro kaayong gidominar ni Golovkin si Alvarez.

Gikatakda unta nga magsangka sila og usab niadtong Mayo 5, apan nakanselar kini kay si Alvarez nagpositibo duha ka higayon sa drug test human nasuta nga nakagamit siya og 'clenbuterol', usa ka matang sa substansiya nga ginadili sa mga atleta, butang nga nakapaulbo sa kaspa ni Golovkin.

Bisan pa man niini, si Golovkin misugot gihapon nga makigsangka og usab ni Alvarez nga sa kanunay iyang gibirahan nga tikasan.

Ang maong isyu nakapabokal og samot sa dugo sa init nang daan nga managkaribal.

Gani nagubot kadiyot ang ilang weigh-in kagahapon human si Alvarez misuway og hamag ngadto ni Golovkin nga makigrambol sab unta dayon sa Mehikanong kampiyon. Maayo na lang gani kay dali silang napugngan sa tagsa-tagsa nila ka mga kampo hinungdan nga napawong ra sab dayon ang tensiyon.

Si Golovkin, ang defending WBA, WBC ug IBO champion, mitimbang og 156.6  libras, samtang si Alvarez mitaak sa timbangan sa gibug-aton nga 159.4  libras.

Bisan og narelaks na, wala kapugngi ni Golovkin nga mokantiyaw ni Alvarez nga iyang gihulagway nga usa ka tigpakatawa sa peryahan.

"I saw he's like a clown. He is showman. He is not true guy," matud pa ni Golovkin.

Sa iyang bahin, si Alvarez masaligon nga siya maoy mopatigbabaw ning ikaduha nilang pinaksitay ni GGG.

"I won the weigh-in, and I'll win the fight," deklara pa ni Alvarez.

Si Golovkin nagbitbit og 38-0-1 record uban ang 34KOs, samtang si Alvarez nagtangag og 49-1-2 nga baraha uban ang 34KOs.