Canelo makatilaw og kastigo—Golovkin

CEBU, Philippines – Mibahad ang undefeated middleweight king nga si Gennady Golovkin nga patilawon og kastigo ang iyang karibal nga si Saul 'Canelo' Alvarez atol sa ilang rematch karong Septiyembre 16 didto sa Las Vegas.

Gawas nga gusto niya pamatud-an nga siya ang mas kusgan nga boksidor human miresulta sa draw ang una nilang sangka ni Alvarez niadtong miaging tuig, si Golovkin naglungot-lungot usab sa Mehikanong kaatbang kinsa iyang gidudahan nga migamit og ilegal nga drugas.

Nasayran nga si Alvarez gisuspenso og pipila ka buwan human mipositibo sa ilegal nga pampalagsik sa iyang drug test.

Nakapasamot pa sa kalagot ni Golovkin mao ang pagbugal-bugal sa mga trainers ni Alvarez ngadto kaniya nga mihulagway kaniya nga usa ka bogo nga boksidor ug dali ra nga pildehon.

"I want to punish him for all the bad things him and his team have done," matud pa ni Golovkin sa Associated Press. "I want to put him down to size."

Ang rematch sa duha maoy usa sa mga giatangan nga boxing match karong tuiga diin segurado nga aduna nay kamot nga iisa.