Gilo, Lumapas bida sa ePerformax, Shearwater
CEBU, Philippines — Sila si Robert Gilo ug Lucien Paolo Lumapas mikablit og atensiyon nunot sa solido nilang 'double-double' nga maoy nagtuboy sa ePerformax Reds ug Shearwater Health Crusaders ngadto sa kadaogan sa Tanduay Athletics E-Leagues for Basketball Season 14 niadtong Domingo diha sa City Sports Club-Cebu Gym.
Si Gilo mitagak og 22 puntos uban ang 18 ka rebounds, tulo ka assists ug tulo sab ka blocks sa dihang gipakaging sa Reds ang Fusion BPO Services Dragons, 80-73, sa Elite Classic.
Lain pang upat ang mikadlit og double figures nga sila si Nolan De la Peña, Rafael Jose Cuico, Christian Maye Mejia ug Patrick Anthony Ybañez nga nagkumboya'g 47 puntos alang sa Reds nga miposte sa ikaduha nilang daog sa lima ka duwa.
Si Niño Belande dunay 25 puntos sa iyang pagbalik human makapalta og duha ka duwa, apan walay nahimo kay ang Dragons natagak ngadto sa 2-3.
Sa laing duwa sa Elite Classic, sila si Earldred Cesar Montilla ug Jan Michael Auditor nagkombinar og 45 puntos sa dihang gitiwasan sa Sykes Pioneers ang kalbaryo sa nagkagidlay nga Telstra-Teletech Boomerangs, 78-61.
Ang Pioneers nakigsawo na karon sa Teleperformance Vipers sa ikaduhang dapit sa liderato bitbit ang managsamang 5-1 win-loss records, samtang ang Boomerangs misaliring sa ikapito nilang sagunson nga pilde. (BANAT NEWS)
- Latest