Sharks mosuway'g tukob sa unang daog sa MPBL
CEBU, Philippines — Human nahisukamod sa ilang 'debut', ang Cebu City Sharks mosuway na sab og angkon sa una nilang daog sa Maharlika Pilipinas Basketball League (MPBL) Datu Cup sa dihang ilang sangkaon ang Parañaque Patriots karong adlawa didto sa Olivares College gym sa Parañaque City.
Ang Sharks ni coach Gilbert Castillo makigbugno sa Patriots sa alas-7:30 sa gabii, human sa sangka sa Bacoor Strikers ug Pampanga Lanterns sa alas-5:30 sa hapon.
Napukan ang Sharks sa labing una nilang duwa sa MPBL batok sa Strikers, 71-76 niadtong Hunyo 21 didto sa Muntinlupa Sports Complex.
Ang Sugboanong si Christopher Sumalinog nga maoy alas sa Strikers mao ra sab ang mipatay sa Sharks.
Si Sumalinog mitapos uban ang 22 puntos, pito ka rebounds, duha ka blocks, usa ka steal ug usa ka assists aron paglugwa nga ikaduhang 'Player of the Week' sa MPBL Datu Cup.
Sunod hamagon sa Sharks ang Basilan Steel karong Hulyo 12 ug dayon ang Manila Stars karong Hulyo 24. (BANAT NEWS)
- Latest
