Celtics 2-0 na

CEBU, Philippines – Si Jaylen Brown mibahog og 23 puntos sa dihang ang Boston Celtics nakasugakod sa 42 ni LeBron James aron tipion pag-usab ang Cleveland Cavaliers,  107-94 ug ingon man pagtali og 2-0 nga bentaha sa ilang 'best-of-seven' NBA Eastern Conference finals kagahapon didto sa TD Garden sa Boston, Massachusetts.

Gawas ni Brown, lain pang lima ka batos sa Celtics ang mitimbre og double figures timaan sa balanse nilang ataki. Si Terry Rozier mitampo og 18 puntos, samtang si Al Horford midugang og 15 puntos ug 10 ka rebounds alang sa Boston nga wala pa mapilde sud sa walo ka duwa sa playoffs didto sa ilang balwarte.

Si James nga mipasa sab og 12 ka assists ug 10 ka rebounds, mikadlit og 21 sa 27 puntos sa Cavs sa unang kuwarter, apan daw mikagar ang iyang opensa sa dihang nayayay ang iyang liog human sila nagbangga ni Jayson Tatum sa  hinapos nga bahin sa ikaduhang kuwarter.

Gipahimuslan og maayo sa Celtics ang pagbahar sa opensa ni James sa second half aron ilubong ang Cavs, 59-39.

Si Kevin Love dunay 22 puntos ug 15 ka rebounds, si Kyle Korver midugang og 11 puntos, apan ang mga starters nga sila si Tristan Thompson, JR Smith ug George Hill nakatigum lamang og 11 puntos.

Dunay tensiyon nga miulbo sa katapusang 3:49 sa duwa diin ang Boston naglabaw og otso puntos, 97-89. Kini human ginawong ni Marcus Morris si Smith human gitukmod ni Smith si Horford sa likod aron pugngan ang lay-up niini. Giduso sab og balik ni Smith si Morris ug ang duha gikinahanglan nga uwangon.

Si Smith gitawgan og flagrant foul sa iyang gibuhat batok ni Horford   ug  silang duha ni Morris gipahamtangan og technical fouls.

Human kanunay nga naggukod sa first half, gikontrolar sa Celtics ang duwa sa hingpit sa dihang miposte og 84-77 nga labaw padung ngadto sa katapusang 12 minutos sa aksiyon. Misurender na ang Cavs human malubong og 14 puntos sa nahibiling  1:48  sa duwa.