Wildcats tiklo sa Cobras

CEBU, Philippines - Gipakgang sa SWU Cobras ang sagunsong duha ka daog sa CIT-U Wildcats pinaagi sa paglubong, 84-74 sa nagkainit nga aksiyon sa 2nd Capt. Raul Cabanero Inter-collegiate basketball tournament niadtong Lunes didto sa Bulacao Talisay Sports Complex.

Mga duwa karon

      7:00 pm -- UV vs. UC

      8:30 pm -- CIT vs. USJ-R

Gawas nga naputol,  ang SWU mao sab ang unang koponan nga nakabuling  sa  rekord  sa CIT-U nga  2-1.

Mibida sa kadaugan sa Cobras si Adam Camara nga miwitik og 23 puntos. Mipakita sab og dakung suporta si William Polican nga mitikdol og 15 puntos sa SWU nga milansang og 26-19 paghuman sa first period.

Sila si Shaq Imperial  ug Gerald Fernandez nagkumbinar og 22 puntos sa SWU, kansang labaw miburot  ngadto sa 14 puntos, 44-30 sa halftime nga maoy gihimo nilang hagdanan aron makab-ot ang una nilang daog sa duha ka duwa.

Anugon lang kaayo ang 39 puntos ni Joshua dela Cerna gumikan kay napandol ang Wildcats sa labing unang higayon sa tulo ka duwa. Laing miiskor og double digits sa Wildcats mao si Tony Lucena sa iyang 14 puntos.

Sa sayo pa, ang USJ-R Jaguars mitukob sa ilang ikaduhang sunod-sunod nga daog human makaipsot batok sa UC Webmasters, 79-74.

Nagmangtas  dayon  ang Jaguars pagsugod nga miresulta sa pagkalubong sa Webmasters sa first quarter, 21-6. Bisan pa niini, ang Jaguars nakasinati gihapon og kakulba sa duwa dihang mi-rally ang UC sa fourth quarter sa pagpangulo nila ni Garciano Puerto ug Jabello nga nagkumboya’g 27 puntos sa kinatibuk-ang duwa.

Ang liga namugna pinaagi sa paningkamot ni Bulacao Talisay Brgy. Capt. Raul Cabanero, inabagan sa iyang mga konsehales  ilabi na nilang Banjo Abastillas, Darwin Cabanero ug Agnes Lastimosa, ingon man sa tanang barangay council SK task force.

Ang mga duwa ubos sa superbisyon ni CESAFI deputy commissioner Danny Duran sa abag ni head technical referee Edwin Dejacto Sr. (BANAT NEWS)