Carcar Inter-Collegiate caging sugdan na

CEBU, Philippines – Lima ka teams ang magbugno alang sa garbo ug dungog sa pagsikad sa 1st Mayor Nice Apura Cup Inter-Collegiate Basketball Invitational karong adlawa didto sa Carcar City Sports Complex.

Ang karibal sa Cebu Schools Athletic Foundation, Inc. (CESAFI) nga University of the Visayas Green Lancers ug University of San Carlos Warriors makigharong sa tagsa-tagsa nilang kaatbang  sa pasiunang kumbati.

Ang Lancers makigtige  sa University of San Jose-Recoletos Jaguars sa alas-8 sa gabii, samtang ang Warriors makighamag sa University of Southern Philippines Foundation Panthers sa alas-6 sa gabii.

Ang Cebu Institute of Technology-University Wildcats moabli sa ilang kampanya ugma pang adlawa batok sa  USJ-R.

Si tournament director Julie Flores nagkanayon nga ang mga entranteng koponan moduwa ubos sa single round robin format diin ang top 2 maoy mag-abot sa kampiyonato.

Ang mokampiyon mobulsa og P50,000, samtang ang mopahiluna sa ikaduha hangtod sa ikaupat nga puwesto modawat og P30,000, P20,000 ug P10,000. (BANAT NEWS)