Alaska andam bisan asa sa SMB ug RoS

CEBU, Philippines - Andam ang Alaska Aces  bisan asa sa San Miguel Beermen o Rain or Shine Elasto Painters ang ilang sangkaon sa finals sa PBA Philippine Cup.

Ang Aces misakmit sa ika-29 nilang finals appearance sa PBA human sa   ilang dominante nga kadaugan batok sa GlobalPort Batang Pier,  118-89  sa Game-5 sa “best-of-seven” semifinals series.

Si  Alaska  team owner  Wilfred Uytengsu mismo ang mibisita sa locker room sa iyang koponan aron i-congratulate ang mga players ug coaching staff niini  sa subli nilang pagduwa sa finals.

Si Uytengsu nagkanayon nga lisud mamili tali sa Beermen ug Painters kun asa ang mas pabor kanila nga sangkaon sa finals.  Nakita ni Uytengsu ug coach Alex Compton nga mas pabor sila sa kasinatian sa finals  kun ang Rain or Shine ilang banggaon sa finals.

Gusto sab ni Uytengsu nga subling ikabangga ang San Miguel nga mipilde kanila sa finals sa Game-7 sa All-Filipino Cup sa miaging tuig .

Sa iyang bahin, ang Cebuano veteran shooter sa Aces nga si Dondon Hontiveros, kinsa nagpangita gihapon sa labing una niyang All-Filipino title miingon nga kinahanglan sila karon nga  mangandam alang sa mas lisud nga hagit sa finals. (BANAT NEWS)