CEPCA 'Battle of Champions' sa December 20
CEBU, Philippines – Andam na ang tanan alang sa grandfinals sa tinuig nga torneyo sa Cebu Executives and Professionals Chess Association (CEPCA) nga gikatakda karong Disyembre 20 diha sa Handuraw Pizza sa dalan Gorordo, dakbayan sa Sugbo.
Mopakita’g aksiyon sa “Battle of Champions” mao sila si two-time grand champion Jimmy Ty Jr., Rey Flores, Arnold Cadiz, Tony Cabibil, Amado Olea Jr., Carlo Maraat, Stein Torres, Jojo Muralla, Peterson Sia, Rogelio Enriquez, Ross Yamyamin ug Martin Kwan sa Group A.
Ang ubang mga qualifiers human nahimong monthly champions sa Group B mao sila si Regelito Hortelano, Ruel Hortelano, Jun Kidlat, Elmer Odango, Jerry Maratas, Felix Balbona, Mike Tinga, Jojo Paredes, Jessa Balbona, Michael Ventulan, Edwin Cablao ug Romy Pialan.
Atol sa usa ka special Board meeting nga gipasiugdahan ni CEPCA president Engr. Jerry Maratas sa miaging gabii didto sa Chika-an Restaurant sa Parkmall, ang grupo nakahukom sab nga mopahigayon og laing kompetisyon alang sa mga non-qualifiers diin ang top 3 makadaog og ganting salapi.
Mitambong sab sa maong panagtigum mao sila si CEPCA founding members Boy Pestaño ug Nicnic Climaco, Ruel Hortelano, Jun Kidlat, Jojo Moralla, Engr. Harveyjane Hilvano, ug FIDE Arbiter Marvin Ruelan.
Ang duha ka torneyo pagahimuon dungan sa ilang Christmas Party ug ingon man pormal nga paghurar sa bag-o nilang mga miyembro.
Ang assessment fee nagkantidad og P250 sa mga guest ug P500 sa club members apil na niini ang rehistrasyon sa torneyo ug panihapon. (BANAT NEWS)
- Latest
