Master Ekin Mibanhaw sa Cebu Fighting Championships MMA fight card kasado na sa Septiyembre 5

CEBU, Philippines — Human sa walo ka tuig nga way kisaw, ang Sugbuanong mixed martial arts patron nga si Master Benigno “Ekin” Caniga Jr. mibanhaw og balik sa Cebu Fighting Championships (CFC) pinaagi sa usa ka kulbahinam ug makalingaw nga MMA fight card nga giulohan og “Kumbati Na! Return of the Warriors” karong Septiyembre 5 sa Barangay Day-as Multi-Purpose Complex sa dalan Imus, siyudad sa Sugbo. Magsugod ang aksyon alas-7 sa gabii.

Sa double main event, magpinaksitay sila si Renan “Limbas” Noblefranca sa Yaw-Yan Ardigma Cebu ug Jhan Villegas sa South Bag Boxing Gym sa Dumaguete City sa usa ka kickboxing bout, samtang si Owen Fabular sa GR8/PMG Dumaguete makigharong ni Jance Clarc Dion Barbaso sa Equilibrium Fitness Center sa Cagayan de Oro City sa usa ka semi-pro MMA nga sangka.

Sa co-main event, si Zen Pacible sa Project X Fight Team sa Mandaue City mosakbang batok ni Trister Yasay sa CDO, samtang si Alex Mabaquiao Jr. sa Saint Warriors/Jiboia BJJ Philippines sa Talisay City makig-engkwentro ni Div Boja sa Tiger Muay Thai Bohol.

Gipaluyohan sa konseho sa Barangay Day-as ubos sa pagpangu ni kapitan Freddie Esmas, mao kini ang unang dagkong pasundayag ni Caniga sukad sa kalibutanhong pandemiya.

Ang pinakauwahi niyang paningkamot aron buhion og balik ang eksena sa MMA dinhi sa Sugbo naglangkob og 10 ka amateur MMA fights, lima ka kickboxing bouts ug lima ka Muay Thai matches, diin pipila ka mga atleta sa Team Cebu City ang mopakita sab og aksyon.

“Nadasig ko og paduwa og balik kay mingaw na sad ang MMA sa Cebu,” matud ni Caniga, usa sa pinakauna nga MMA ug kickboxing promoter sa Sugbo nga kaniadto nag-organisar sa CFC, “Ground and Pound,” ug “Cebu Extreme Fight League” MMA series.

“Dako ni nga sugal para nako kay mao pa pagbalik nako para mabalik ang MMA sa Cebu. Nindot gyud ang lineup ani nga fight,” dugang sa CEO sa YawYan ArDigma Martial Arts Federation.

Si Caniga, nga mao usab ang head coach sa Cebu City Muay Thai ug kickboxing teams, naglaum nga ang pagbanhaw sa CFC mahimong unang lakang padulong sa pagbalik sa mas regular nga mga promosyon sa MMA dinhi sa probinsiya.

Ang mga tiket nagkantidad og P500 sa lower box ug P1,000 sa ringside.