Ycong, Dequina midominar sa Hunat Sugbu Triathlon 3

CEBU, Philippines – Sila si Jorry Ycong sa Omega Pro-Repro Optima ug Aimee Dequina maoy nanghawod sa tagsa-tagsa nila ka kategoriya sa 3rd Hunat Sugbu Triathlon niadtong Domingo didto sa lungsod sa Argao.

Si Ycong maoy naghari sa men’s division human gitapos ang lumba sud sa oras nga duha ka oras, siyete minutos ug nuybe segundos. Nagsunod kaniya mao si Emmanuel Commendador sa oras nga 2:08:20, samtang ang pambato sa Alaska Tri-Aspire nga si Kristiane Lim nalandig sa ikatulong puwesto sa oras nga 2:15:05.

Sa women’s category, ang beteranang Boholana triathlete nga si Aimee Dequina maoy misakmit sa korona sud sa oras nga 2:51:29. Mipatong sa  duha ka puwesto mao sila si Mary Luz Shimizu (3:02:21) ug Cianyl Gonzalez (3:03:42).

Sa laing mga kategoriya ubos sa standard distance, sila si Welmar Saavedra maoy mipatigbabaw sa 29-under, Allen Nitollama sa 50-above, Romulo Rosell sa 40-49, ug Joseph Miller sa 30-39.

Ang mga age-group winners sa women’s bracket mao sila si Odiza Abellana (40-above) ug  Denise Abcede (30-39), samtang ang Trimac maoy midominar sa relay event.

Gawas sa kadaugan ni Ycong, ang hiniusang puwersa sa Omega Pro ug Repro Optima maoy nanghawod sa tri-team challenge sa oras nga 13:30:55.

Segun sa gihandum, ang mga top junior triathletes sa Sugbo maoy miwadwad og maayo sa sprint distance nga gipangulohan nilang Raffy So ug Aaliyah Ricci Mataragnon.

Si So miposte og oras nga 1:13:26 nga abante  kaayo nilang Christian Saladaga (1:15:40) ug Sean Yu (1:16:36).  Sa female division, si Mataragnon mitali og oras nga 1:15:49 aron pagpukan sa iyang bestfriend nga si Issa Priagula (1:22:49), samtang si Shaia Ruth Uy  maoy nalandig sa ikatulo sa oras nga 1:32:26.

Nagmalampuson sa tagsa-tagsa nila ka mga dibisyon mao sila si Allan Sacris (50-above), Jezryl Villarete (20-29), Karl Le (19-under), Sonny Sandico (40-49), Expedito Dublin (30-39), Lalaine Sacris (40-above), Zusette Co (30-39)  ug Arriza Tirol (20-29). (BANAT NEWS)