Viloria gibaharan nga tumbahon ni Gonzales sa ilang sangka sa oktubre 17

CEBU, Philippines - Nanganti ang Nicaraguan boxing star nga si Roman ‘Chocolatito’ Gonzales nga iyang  pahigdaon ibabaw sa ring ang Fil-American challenger nga si Brian ‘Hawaiian Punch’ Viloria sa ilang sangka sa Oktubre 17 didto sa New York.

Sa taho sa boxingscene.com, kompirmado na nga si Viloria, ang kanhi WBO/WBA flyweight champion  maoy challenger alang sa WBC title ni Gonzales.

Si Gonzales, kinsa adunay   43-0, 37KOs record miingon nga kusog si Viloria, apan nakita niya nga kuwang kini sa footwork  rason nganong  mapatumba niya kini atol sa ilang sangka.

Si Viloria maoy ikaduhang Pinoy nga mahimong challenger ni Gonzales human  gi-TKO sa nauwahi si ALA Boxing Gym fighter Rocky Fuentes niadtong  Nobiyembre didto sa Japan.  (BANAT PALARO)