Contractor sa taytayan sa Pulangbato gipatawag

CEBU, Philippines — Giaprobahan sa Cebu City Council ang resolusyon nga naghangyo sa contractor sa rehabilitasyon sa Sitio Candarong Bridge sa Barangay Pulangbato kauban ang Department of Engineering and Public Works (DEPW) ug Commission on Audit (COA) alang sa usa ka executive session nunot sa pagkalangay sa construction niini.

Atol sa regular session nga gipahigayon niadtong Miyerkules, si Konsehal Noel Wenceslao, chairman sa committee on budget and finance sa konseho sa siyudad nihatag og privilege speech diin alang kaniya  urgent call ang katukoran  sa reinforced deck girder bridge diha sa nahisgutang lugar paingon sa Tanay Road.

Ang maong proyekto usa ka city-funded project.

Si Wenceslao nagkanayon nga ang gasto sa construction nikabat ngadto sa P24 milyones diin gisugdan kini niadtong Septiyembre 15, 2023 ug matapos unta sa 240 calendar days.

Ang contractor sa proyekto mao ang DVD Builders ug matud ni Wenceslao nga niabot na sa 243 ka adlaw ang construction sa proyekto.

Gibutyag ni Wenceslao nga sa iyang pagbisita tulo ra ka tawo ang nagtrabaho ug nagpadayon pa ang pagkubkob diha sa lugar.

"Nya wala pa gani maiilisi ang foundation, ang beams ug ang poste, in other words Mr. Chairman, layo pa kayo sa kahumanan", ni Wenceslao pa.

Ang opisyales ug mga residente sa barangay nabalaka diin ang mga sakyanan kasamtangang motabok diha sa sapa diin delikado kini kong moabot ang panahon sa ting-uwan.

Niadtong buwan sa Abril niining tuiga ang mga opisyal sa barangay mihimo og formal letter of complaint ngadto sa City Engineer kabahin sa pagkalangay sa construction.

Ug hangtud sa pagsuwat niining balita pa wala pay tubag gikan sa contractor. (BANAT NEWS)