Banned for life
CEBU, Philippines – Lain na sab nga high school player ang nasakpan nga nimaniobra sa iyang ‘birth certificate’ nga iyang gisumiter ngadto sa Cebu Schools Athletic Foundation, Inc. (CESAFI).
Si Mark James Roa sa Cebu Eastern College (CEC) Dragons ‘banned for life’ sa tanang mga sports events nga pasiugdahan sa CESAFI tungod sa nahimo niyang salaud.
Matud pa ni CESAFI commissioner Felix O. Tiukinhoy Jr., nga ang mga kadagkoan sa CEC mipahibalo kaniya nga ilang nadiskubrehan ug nasuta nga ‘overaged’ ang ilang player nga si Roa tungod kay ang tinuod niyang natawhan Nobiyembre 15, 1995 sukwahi sa iyang giduso nga NSO nga Nobiyembre 15, 1997
Tungod niini, ang 85-68 nga kadaugan sa Jaguars batok sa University of Cebu Junior Webmasters sa season-opening gihatag ngadto sa nauwahi.
Ang kaso ni Roa daw usa ka flashback sa record tampering fiasco nga mitay-og ug gani maoy hinungdan sa pagdisband sa pagbalik sa Southwestern University high school team.
Sa wala pa sugdi ang season, ang CESAFI screening committee nga gipangulohan ni lawyer Marvin Pañares, Dr. Danny Villadolid ug deputy commissioner Danny Duran nakasakop nga ang siyam sa 15 ka mga player sa SWU sa secondary division miduso og tampered NSO records.
Sa ilang makuti nga imbestigasyon, lima ka players ang miadmiter sa ilang tinuod nga date of birth nga nakita sa original NSO ug mitumbok ngadto ni coach Rey Lubguban, usa ka kanhi SWU Cobra maoy mimando kanila pagbutyag sa dili tinuod nga petsa. Sila mao si Elber de la Cerna Catinggan, Reynaldo Obarco, Mark Anthony Quilab, Andi Jones Turno ug Edwin Abo-abo.
Ang labing edaran nila mao si Quilab, kinsa 25-anyos na. Ang tinuoray niyang date of birth mao ang Agosto 28, 1990 ug dili Agosto 28, 1998 sa gi-submit nga NSO.
Gumikan niini, ang lima ka players ug ingon man si coach Lubguban pulos sab gisagpa og ‘banned for life’ pagduwa sa CESAFI. Gitangtangan sab sila sa SWU sa ilang athletics scholarship ug gipapauli sa ilang lugar sa Cagayan de Oro. (BANAT NEWS)
- Latest
