Water Market, laing duha gisugat og daog sa power 40 Cagefest 2015

CEBU, Philippines - Gisugat og yano nga kadaugan  ang  Water Market dihang ilang gilumsan ang Park  ‘N Go, 103-84  pagsugod sa Power Forty basketball tournament 2015 niadtong Martes sa gabii diha sa Inayawan Sports Complex.
Sa sayong bahin pa lang sa third quarter, nakapanemaho na og daog ang Water Market ni Vez Eleguin human  molabaw og 23 puntos, 65-42 ug mitubo pa ngadto sa 34 puntos paingon sa final period.
Si Poldiberto Tantiado maoy nangu sa balanseng opensa sa Water Market nga mikandos og 25 puntos, gisundan ni Alan Borces nga mihabwa’g 18 puntos. Si Joel Jaca mikabo og 16 puntos, samtang sila si Gogo Fuentes ug Michael Veloso miabuno’g 14 ug 10 puntos.Ang Park N’ Go ni Romy Rama  gipangulohan ni Michael Arias pinaagi sa  26 puntos. Si Al Misa miamot og 24 puntos, samtang si league commissioner ug CESAFI head referee Edwin Dejacto Sr. mitimbre’g 17 puntos. Si Hermes Abasolo mitimang og 11 puntos.
Sa pasiunang duwa, ang Zebra  Helmet ni  Alan Lim midaog sab batok sa HLY ni  Atty. Flor Yosores, 72-64. Sila si Robert Abasolo ug Tony Ungria nagkumboya 34  puntos aron mangu sa Zebra Helmet. Gipangulohan sab ni Fernando Sumargo ang HLY  sa iyang 17 puntos, gisundan ni Alex Mercado nga adunay 15 puntos. Sila si Julian Capala ug Cocoy Dequit parehong miamot og 10 puntos  alang sa  HLY.
Midaog sab ang Pardo Builders ni Lando Almojallas batok sa Bob & Chino nilang Chino Kalinga ug Bob Samson, 87-82.
Si Boboy Rosito mikulit og 23 puntos aron mangu sa Pardo Builders. Si Bowen Canarias mitikdol og 20 puntos, samtang sila si Jun Salazar ug Cartney Navares mitimbre’g 14 puntos matag usa. Ang Bob & Chino gipangulohan ni Jun Abapo, kinsa mitusak og 20  puntos, gisundan ni Wewe Cabrera sa iyang 18 puntos ug Edward Buhay nga adunay 17 puntos. Si Alan dela Rama mitampo’g 12 puntos. (BANAT NEWS)

PUNTOS MATAG USA

Unang duwa:
Zebra Helmet (72) – Abasolo 24, Ungria 10, Sabandeja 8, Chiong 8, Marturillas 6, Villaber 4, Gaviola 2.
HLY (64) – Sumargo 17, Mercado 15, Capala 10, Dequit 10, Yosores 5, Tantay 3, Nacional 3.

Ikaduhang duwa:
Water Market (103) – Tantiado 25, Borces 18, Jaca 16, Fuentes 14, Veloso 10,  Traya 6, Damolle 5, Lim 4, Cayobit 3, Eleguin 2.
Park N’ Go (84) – Arias 26, Misa 24, Dejacto 17, Abasolo 11, Ozon 4, Echavez 2.
Ikatulong duwa:
Pardo Builders (87) – Rosito 23, Canarias 20, Salazar 14, Navares 14, Mabalcon 8, Ocba 4, Ibernas 2, Cantarona 2.
Bob & Chino (82) – Abapo 20, Cabrera 18, Buhay 17, Dela Rama 12, Tabar 8, Abellanosa 4, Cabatas 3.