Angel Mary gipaluhod sa D&L

CEBU, Philippines – Nasakmit sa D&L team ang solong liderato human ilang gipaluhod ang Angel Mary Pawnhop sa iskor, 81-77 pinaagi sa overtime alang sa ilang ikatulong sagunson nga daog kaniadtong Huwebes sa 8th season sa F. Llamas Youth Association (FYA) basketball tournament didto sa sitio Manggahan sa barangay Punta Princesa, ning dakbayan.

Sa primerong duwa, mikulit sa labing una nilang daog human sa tulo ka pagsuway ang Simple Likes Resto Bar human ilang gilubong ang RAV sa iskor, 104-90.

Dili na unta molanat pa ngadto sa overtime ang duwa ug modaog na unta ang Angel Mary dihang nakakubit og foul si Ryan Villaver gikan ni Ariel Mayol apan misipyat si Villaver sa iyang duha ka free throws sa regulation.

Didto sa overtime period, wala na makasustenir ang Angel Mary.

Ang kanhi shooter sa UC Webmasters nga si Dandan Enriquez maoy nangu sa D&L sa iyang 27 puntos samtang midugang og 18 puntos si Victor Lastomen.

Parehong mitampo og 10 puntos matag usa silang Mayol ug Epi Sabalande alang sa D&L samtang si Jim Rara maoy nangu sa Angel Mary (2-1) sa iyang 19 puntos.

Sa sayo pa, mibahug og 24 puntos si Janus Abellana aron tabangan ang Simple Likes (1-2) nga putlon ang duha ka sagunson nga pilde samtang miburak og 22 puntos si USC Warriors coach Britt Reoma ug midugang si Noel Medalle og 15 puntos.

Si Beking Rollon maoy nangu sa RAV (0-2) sa iyang 19 puntos ug midugang si Bulldog Mirasol og 17 puntos. Laing tulo ka players sa RAV ang mihimo sad og double figures dihang parehong mihakot og 16 puntos matag usa silang Baeng Medalle ug Junrey Arreglo ug nay 12 puntos si Lope Lavandero.

Puntos matag usa:

First Game:

Simple Likes (104) – Abellana 24, Reroma 22, N. Medalle 15, Abella 9, Zapanta 8, Rabe 8, Abendan 7, Gambe 6, Cueme 4, Canceko 2.

RAV (90) – Rollon 19, Mirasol 17, B. Medalle 16, Arreglo 16, L. Lavandero 12, E. Lavandero 5, Sabalande 3, Trinidad 2.

Second Game:

D&L (81) – Enriquez 27, Lastomen 18, Sabalande 10, Mayol 10, Abella 8, Parba 6, T. Parba 6, Barro 2.

Angel Mary (77) – Rara 19, Ramirez 14, Avila 13, Villaver 9, Mendoza 9, Alkuin 6, Cabreros 2. (BANAT NEWS)