SHS-Ateneo naka 5-peat sa NBTC
CEBU, Philippines – Nagmangtas og maayo ang Sacred Heart School-Ateneo de Cebu (SHS-AdC) Magis Eagles aron ilubong ang University of the Visayas (UV), 110-75 ug ingon man pagsakmit sa ikalima niining sunod-sunod nga titulo sa NBTC Elite League Cebu Regional Championship niadtong Domingo didto sa Hoops Dome, dakbayan sa Lapu-Lapu.
Sa sinugdanan pa lamang mura’g nahuman na ang duwa sa dihang si Pio Longa miratsada og 16 puntos, apil na niini ang tulo ka 3-pointers aron pagtunol sa Magis Eagles og 19 puntos nga labaw, 41-22, human sa unang kuwarter. Si Longa mitapos og 22 puntos.
Nagpadayon ang init nga opensa sa Magis Eagles kay human nila gitak-op ang halftime, 63-35, ila pang giinat ang ilang labaw ngadto sa 44 puntos, 96-52 paingon sa final period.
Miabag ni Longa sa kampo sa SHS-Ateneo mao si Jan-Jan Jaboneta nga mipatuasik og 20 puntos. Sa kinatibuk-an, balanse ang opensa sa Magis Eagles kay usa lamang sa 14 niini ka players ang wala maka-iskor.
Si Orlan Wamar maoy nangu sa UV bitbit ang 25 puntos.
Sunod nga sangkaon sa Magis Eagles mao ang mananaog sa NBTC East Visayas leg. Ang modaog sa maong duwa moabante sa NBTC National Finals nga gikatakda karong Marso 6-8 didto sa kaulohan.
Puntos Matag Usa
SHS-Ateneo (110) – Longa 22, Jaboneta 20, Chua 10, Araw-araw 9, Sinclair 9, Co 9, Nacua 8, Huang 7, Mantua 6, Colonia 4, Mayol 3, Visser 2, Gaviola 1.
UV (75) – Wamar 25, Cabahug 19, Flores 16, Borbon 6, Schaub 5, Zenarosa 3, Loreto 1. (BANAT NEWS)
- Latest
