SWU naglisud pagpilde sa UV
CEBU, Philippines - Nakaipsot ang Southwestern University (SWU) Cobras ug ang University of San Carlos (USC) Warriors sa pagsugod sa 10th Asian Universities Basketball Championship (AUBC)-Cebu Province International Collegiate Cup sa miaging gabii didto sa Don Celestino Martinez Sr. Memorial Coliseum sa Bogo City.
Ang Cobras nga bag-o lang gikoronahan sa Cebu Schools Athletic Foundation Inc. (CESAFI) miagi una sa lungag sa dagum una nila napilde ang University of the Visayas (UV) Green Lancers, 61-60, samtang ang Warriors nakabangon gikan sa 19 puntos nga pagkalubong sa first quarter aron mapukan ang bisitang Myongji University gikan sa South Korea, 84-78.
Ang go-ahead basket ni Daryl Goloran sa katapusang 41 segundos sa duwa maoy nakaanghel sa Cobras. Dihang ball possession sa UV, si Leonard Santillan nakakubit og foul gikan ni Landry Sanjo, apan napakyas ang ilang tinguha paghatod sa duwa ngadto sa overtime dihang si Santillan mipasud lang og usa ka foul shot sa nahabiling 31 segundos.
Si Landry Sanjo maoy topscorer sa Cobras sa iyang 15 puntos, samtang ang back-to-back CESAFI MVP nga si Mark Jayven Tallo miamot og 13 puntos ug si Goloran mitampo’g 10 puntos.
Ang UV Green Lancers gipangulohan sab ni Cris Perolino, kinsa mihipos og 14 puntos, gisundan ni Steve Cedrick Akomo nga adunay 13 puntos.
Sa main game, ang Warriors miagi una og 11-30 nga lubong sa first quarter, apan mi-rally sila sa second period aron makatabla, 38-all sa halftime.
Katapusang nakalabaw ang Myongji University sa iskor nga 78-76 sa nahabiling 2:18 sa duwa kay ang import nga si Shooster Olago mihimo’g sunod-sunod nga basket aron hatagan ang USC og daog.
Si Olago mirehistro og 39 puntos alang sa Warriors, kinsa nakakuha sab og suporta nilang Victor Rabat ug Espoir Toyambi nga nagkumboya’g 23 puntos. (BANAT PALARO)
- Latest
