2nd Lou Ornopia basketball tourney sugdan karong sabado sa Calambua
CEBU, Philippines - Plansado na ang tanan alang sa pagpahigayon sa 2nd Brgy. Capt. Lou Ornopia Basketball Tournament nga mosikad karong Sabado didto sa Calambua open court sa San Remigio sa amihanang lungsod sa lalawigan sa Sugbu.
Gawas pa niana, gipaburot sab og maayo ni Ornopia ang ganting salapi gikan sa P30,000 sa miaging tuig ngadto sa P50,000 ug ning higayona, ang kampiyon mobulsa na og P20,000.
Mohatag sab si Ornopia og special awards ngadto sa "best muse" ug sa "best in uniform" atol sa opening salvo, samtang ang outstanding achievers sama sa regular season MVP ug Mythical Five makadawat og cash incentives.
Upat ka teams nga palig-onan sa ilang imports ang mopakita'g aksiyon sa maong torneyo nga gipaluyohan sa Calambua barangay council ubos sa liderato ni Brgy. Capt. Lou Ornopia.
"We are staging this tournament again because we want the people of Calambua and its neigboring barangays in San Remigio to experience a highly entertaining hardcourt action. Seldom they see competitive games with star players joining in and this is their opportunity," matud pa ni Ornopia, kinsa nabantog sa kalibotan sa paugnat sa kusog isip "godfather" sa Cebu motocross.
Gipresentar sab sa MS Motosuit, ang usa ka bulan nga kompetisyon gisuportahan sab sa F & FO Motor Parts, JCO Motor Parts, Prospeed, Speed-up, Motomaze, Keiz BJ Motors, Bradder Moto Access, RMO Motor Parts and N Style.
Suportado sab kini nilang Congressman Benhur Salimbangon, Provincial Board Members Sun Shimura ug Joven Mondigo, Vice Mayor Al Pestolante, SB Member Rizmar de la Peña, Ramon Montealto ug Diosdado Navarez.
Gawas sa basketbol, si Ornopia nangandam na sab sa iyang umaabot nga six-leg MS Motosuit Motocross Series nga mosikad sa Abril 12 didto gihapon sa Calambua.
- Latest
