Niño Siso moduwa sa 65th Indian Club Open Tennis Tournament

 CEBU, Philippines - Ang Sugbuanong si Niño Siso moduwa na sab og internasyonal nga kompetisyon  pinaagi sa 65th Indian Club Open  Tennis Tournament nga gitakda sa Nobiyembre 25-29 didto sa Bahrain.

 Bisan pa'g si Siso wala kaayo mopakita'g aksiyon sa nanganging mga katuigan kay mipokus kini  sa  iyang  pagtuon isip tinun-an sa nursing sa University  of  San Carlos (USC), wala gihapon siya mohunong sa training  kay  iya kining obligasyon sa eskuylahan isip tennis varsity.

 Tukma ang imbitasyon  nga gitanyag gikan sa Indian Club gumikan kay ang kanhi No. 1 junior tennis player sa Sugbu nangandam  sa iyang seryosong pagbalik sa tennis  inig  gradwar  niya  sunod tuig.

 Si Siso gidapit sab aron moduwa sa super singles, ang premiere event sa maong aksiyon.

 Lain pang mga events nga tigian mao ang boys' 18, men's doubles, ladies singles, men's veteran singles and doubles ug super veteran doubles.

 Mga langyaw'ng magduduwa gikan sa UAE, Qatar, Dubai, Kuwait, Pakistan, India ug uban pa, ang gilauman sab nga mosalmot sa maong lima ka adlaw nga kompetisyon.

 Unang gihatag ang imbitasyon ngadto  sa numero unong players sa nasud nga si Johnny Arcilla, apan mibalibad kini kay gikatakda siyang modepensa  sa  iyang titulo sa  PCA Open.

 Si Siso  katapusang niduwa sa internasyonal nga kompetisyon niadtong World Juniors Championship didto sa India, upat na ka tuig ang nilabay. (BANAT NEWS)