USC midaog sa Visayas Passerelle title

CEBU, Philippines - Nagbahin sa korona ang University of San  Carlos ug ang University of  St. La Salle- Bacolod  sa Passerelle ug Small Baskeeters of the Philippines (SBP) division sa Visayas Regional Finals sa BEST SBP Passerelle Twin Tournament 2013 didto sa Iloilo Sports Complex sa Iloilo City.

 Ang USC midaog batok sa USLS-Bacolod, 60-39 aron sakmiton ang titulo sa Passerelle division, apan napilde ang USC sa USLS sa SBP division, 33-41 sa ilang championship game.

 Ang USC ug ang USLS maoy morepresentar sa Visayas sa Passerelle ug SBP division atol sa National finals didto sa San Fernando, Pampanga unya sa Nobiyembre 23-24.

 Human sa ilang 13-5 nga labaw sa first quarter, namuntos og maayo silang John Galinato ug Daniel Rodriguez nga nagkumboya'g 12 puntos didto sa second quarter aron inaton ang labaw sa USC ngadto sa 31-14 atol sa halftime.

 Gitiwasan pa gyud kini ni Kent Malazarte, kinsa maoy namuntos sa third quarter aron hatagan ang USC og 19 puntos nga abante, 45-26 pagsugod sa fourth period.

 Mihulga ang USLS sa sayong bahin sa third period diin misikit sila ngadto na lang sa 10 puntos nga biya, 23-33, apan kalit nanginit ang kamot ni Malazarte dihang nakahimo siya'g duha ka three-point plays.

 Silang Malazarte ug Galinato nagkumboya og 12 puntos sa fourth period diin wala na nila hatagi'g higayon nga mosikit pag-usab ang USLS.

 Si Galinato maoy nangu sa USC sa iyang 14 puntos, samtang si Malazarte midugang og 12 puntos.

 Ang USLS gipangulohan ni Astrolave Vista, kinsa miiskor og 10 puntos.

 Kun unsa kasayon  gilampurnas sa USC ang ilang mga karibal sa Passerelle division, ingon sab kalisud ang nahiaguman sa ilang SBP counterparts nga nasugamak og duha ka pilde ngadto sa USLS.

 Ang La Salle Greenhills maoy unang nakalukat og tiket ngadto sa finals sa SBP division sa Metro Manila leg, samtang ang Chiang Kai Shek High School maoy kampiyon sa Passerelle division.

 Ang Ateneo de Iloilo sa laing bahin, maoy misakmit sa ikatulong pwesto sa SBP ug sa Passerelle divisions. Ang Ateneo de Iloilo  mipukan sa  College of St. John sa Roxas, 50-37 sa Passerelle division finals ug sa Colegio de la Purisima Concepcion sa  Roxas, 53-26 sa SBP finals.