Kinamangay na

CEBU, Philippines -  Pulos misaad og knockout sila si WBO  International light welterweight champion  Jason 'El Niño'

Pagara (25-1, 17KOs) ug Mexican challenger Aaron 'Jewel' Herrera (30-2, 19KOs)  sa ilang sangka sa main event of "Pinoy Pride XX: Laban Kung Laban" karong gabii didto sa Waterfront Cebu City Hotel and Casino.

 Ang 22-anyos nga si Pagara, kinsa modepensa sa iyang bakus, nagpas-an karon og bug-at nga misyon nga ibangon ang dungog sa mga Filipino boxers nga nakahiagum og sunod-sunod nga kapildihan batok sa mga Mexican boxers sama nila ni Manny Pacquiao, Brian Viloria ug  Rey Bautista.

 Si Bautista bag-o lang  giparetiro sa Mehikanong si Jose Ramirez atol sa ilang sangka niadtong Abril 4 didto sa Davao City.

 "Importante gyud nako ning away ug gusto ko mohatag og dungog sa atong nasud," matud pa sa garbo sa Cagayan de Oro City nga si Pagara.

 "Wa ko ka-feel og pressure tungod kay nag-train ko og maayo ug maningkamot ko nga modaog pinaagi sa knockout," dugang pa niya.

 Sa iyang bahin, si Herrera daku'g pagsalig sa iyang   kaugalingon atol sa weigh-in kagahapon didto sa The Event Centre sa SM City-Cebu diin kanunay niya nga gipakita ang maskulado niyang bukton atubangan ni Pagara.

 "There will be a knockout. I don’t know what round, but I can promise that there will be a knockout," matud pa ni Herrera.

  Sila si Pagara ug Herrera parehong mitimbang og 139 lbs.  sa official weigh-in kagahapon.  Sa iyang bahin, si ALA Promotions President Michael Aldeguer misaysay nga usa kini ka krusyal nga away

alang ni Pagara kay dinhi masukod kun andam na ba siya sa mas dagku nga away sama sa usa ka world title shot.

  "This is a make-or-break fight for Pagara. He needs to do well in this fight to show that he is ready to go to another level," matud  ni Aldeguer.

 Laing ALA Gym fighters   nga sila si undefeated WBO Asia-Pacific super bantamweight champion Genesis 'Azukal' Servania ug Jimrex 'The  Executioner' Jaca mopakita sab sa ilang abilidad sa supporting bout ning hinugpong nga fight card sa ALA Promotions ug sa ABS-CBN Sports.

 Si Servania (19-0, 7KOs) modepensa sa iyang bakus batok ni Indonesian Isack Junior (20-3, 8KOs), samtang si Jaca (37-6, 21KOs) makigsangka batok ni  Mexican 'Gigante' Perea alang sa bakanteng WBO Oriental light welterweight belt.