Sa 17th jay Swanson memorial 9-ball: Orcollo sumargo uli ng titulo

MANILA, Philippines - Ipinamalas uli ni Dennis Orcollo ang kahusayan sa paggamit ng slow break upang angkinin ang titulo sa 17th Jay Swanson Memorial 9-Ball Tournament sa Hard Times Billiards sa Belflower California kamakailan.

Hindi natalo si Orcollo sa kabuuan ng torneo at hiniya sa finals si Jayson Shaw ng United Kingdom sa race-to-13 finals sa dominanteng 13-3 iskor.

Dalawang beses na hinarap ni Orcollo si Shaw sa torneo at ang una ay  para sa hot seat na kung saan nanalo rin ang Filipino cue-artist.

Nakuha ni Shaw ang karapatang lumaban sa titulo nang manaig kay Rod­ney Morris ng USA.

Sa finals, si Shaw ang nanalo sa lag at makuha ang unang laban pero nai­suko ang second game para sa 1-1 tabla.

Mula rito ay inilabas ni Orcollo ang husay sa soft break na siyang gusto ng mesang pinaglabanan tungo sa madaling panalo.

Kinabig ni Orcollo ang unang gantimpala na nagkahalaga ng $3000.

Nakontento si Shaw sa $1,500.00 habang $1000.00 ang binitbit ni Morris.

Ito rin ang ikalawang pa­nalo sa taon ni Orcollo matapos pagharian ang Derby City Classic Bigfoot 10-ball Challenge at ibulsa ang $20,000.00 premyo.

Matapos ang limang tor­neo, ang dating number one pool player sa mun­do ay kumabig na ng kabuuang $43,000.00 premyo.