Sara walay ebidensiya
Duha ka semana human gilibkas sa Senate impeachment court ang pagdili batok ni Bise Presidente Sara Duterte pagtuki sa merito sa articles of impeachment nga gibakwi sa prosekusyon, wala pa gihapon siyay napakita nga bisan unsang ebidensiya pagpanghimakak nga:
Gihulga niyang ipapatay silang Presidente Ferdinand Marcos Jr., First Lady Liza Araneta Marcos ug kanhi House Speaker Martin Romualdez;
Gibolsa niya ang P612.5 milyones nga confidential funds sa Office of the Vice President (OVP) ug Department of Education (DepEd); ug
Gisuburnohan niya ang mga opisyal ug mga trabahante sa DepEd.
* * *
Maong nisamot ang pagduda sa House prosecutors nga walay bisan usa ka testigo ni dokumento nga giandam ang kampo ni VP Sara aron ipresentar inig abot na sa ilang turno sa depensa sa pagpadayon sa impeachment trial sunod buwan. Samtang trabaho sa prosekusyon ang pagmatuod sa mga pasangil, nagpaabot ang publiko sa gipasalig ni VP Sara nga pagtubag sa tukmang venue ug panahon.
Tinuod gyod diay tingali nga ang kinakusgang depensa ni VP Sara mao ra ang walay kinutoban nga technicalities ug objections aron paglangay ug paglibog sa husay.
* * *
Dihang nagdumili ang prosekusyon sa pagpatawag ni Koronel Dante Lachica, kanhi pangulo sa Vice Presidential Security and Protection Group, nga ginganlan ni kanhi disbursing officer Gina Acosta nga maoy gihatagan sa tanang confidential funds sa OVP, niinsistir ang mga dumadapig ni VP Sara nga ang testimoniya ni Lachica moguba sa mga ebidensiya sa prosekusyon.
Hain na man si Lachica? Nganong hilom man ang payag sa giingon nga kinalig-onan nga testigo pabor ni VP Sara?
* * *
Dili hinuon mabasol ang depensa kon nitingob sa usa ka buwan nga lugway sa dili pa mobalik ang husay sa Nobyembre 9, posible gani nga gikanselar ang ilang bakasyon sa Kalag-Kalag, sa pagpangandam sa tubag sa mga ebidensiya sa prosekusyon sa nahibilin nga article of impeachment sa hidden ug unexplained wealth.
Kay pulos gikan ni VP Sara ang nagkasungi nga mga dokumento sa iyang katigayonan (bank accounts, records sa Anti-Money Laundering Council ug Securities and Exchange Commission, income tax returns ug statements of assets, liabilities and net worth). Kinahanglan nang ipasabot kay dili nang kapasangil og fishing expedition ug politikanhong pagpanggukod.
* * *
- Latest
