Texters VS. Alaska
CEBU, Philippines - Duha sa mga labing init nga koponan nga mao ang top seeded Talk N’ Text Tropang Texters ug Alaska Aces ang magsangka sa nagpadayong elimination round sa PBA Philippine Cup karong gabii didto sa Smart Araneta Coliseum.
Ang Texters makigharung sa Aces sa main game sa alas-7:30 sa gabii human sa duwa tali sa Petron Blaze Boosters ug Air21 Express sa alas-5:00 sa hapon.
Giatangan nga sikit ug init ang kompetisyon tali sa duha ka koponan ilabi na nga aduna silay tagsa-tagsa ka mga winning-streak nga panalipdan.
Ang Talk N’ Text wala pay pilde sud sa pito ka duwa, samtang ang Alaska tinguha nga lugwayan ang ilang four-game winning streak.
Sama sa gihapon, si Texters coach Norman Black magsalig sa ilang balanse nga opensa sa pagpangulo sa mga backcourt shooters sama nila ni Larry Fonacier, Jimmy Alapag, Jason Castro ug Jared Dillinger.
Mobida sa Alaska ang kanhi NCAA MVP ug No.2 pick nga si Calvin Abueva kinsa magsalig sa suporta nila ni Cyrus Baguio, Dondon Hontiveros ug JV Casio.
(BANAT NEWS)
- Latest
