Kia Motors/CIT-U buhi pa sa 6th CESAFI Partner's Cup basketball tournament

CEBU, Philippines - Mipabuhagay og 30 puntos si Floyd Taboada alang sa Kia Motors/CIT-U Wildcats nga nakaipsot batok sa San Marino Corned Tuna/USPF Panthers, 74-72 aron pabiling buhi alang sa finals sa 6th CESAFI Partner's Cup kagabii didto sa Cebu Coliseum.

Human mahanaw ang ilang 21-13 sa first period, ang Kia Motors naghangad sa mga tira ni Taboada, kinsa miposa og tulo ka triples sa second quarter aron makuha pagbalik ang labaw sa halftime, 41-33.

Nakatabla ang San Marino, 69-all luyo sa paningkamot nilang Joseph Sedurifa ug Fritz Dajalos sa katapusang tres minutos sa duwa. Apan sila si Jeffrey Taghoy ug Gestino Baclaan mihimo og sunod-sunod nga crucial baskets aron hatagan ang Kia Motors og kuwatro puntos nga labaw, 73-69.

Sila si Dajalos ug Sedurifa parehong mipupo og 15 puntos alang sa San Marino nga natagak na sa four-team single round robin semis. BANAT NEWS